धरान : सरकारले इन्टरनेटको माध्यम सामाजिक सञ्जाल अनुगमन, दण्ड सजाय सम्पन्धि विधेयक संसदमा दर्ता गरेपछि त्यसको पक्ष विपक्षमा बहस सुरु भएको छ ।
अभिव्यक्ति तथा प्रेस स्वतन्त्रता पक्षधरहरूले विधेयक प्रेस तथा अभिव्यक्ति स्वतन्त्रतालाई प्रभावित गर्ने प्रकृतिको भएकोले त्यसमा सुधार नगरी संसदमा लैजान नहुने बताइरहेका छन् ।
केही गैरसरकारी संस्था इन्टरनेटको सुरक्षित प्रयोगलाई जोड दिइरहेका छन् । सुरक्षित इन्टरनेट दिवसको अवसरमा भ्वाइस अफ चिल्ड्रेन नामक संस्थाले शनिवार सुरक्षित प्रयोगबारे जनचेतना कार्यक्रम गर्‍यो ।
सडक नाटक प्रदर्शन सहित भएको कार्यक्रममा विधेयकले इन्टरनेट मार्फत चल्ने सामाजिक सञ्जालका माध्यमबाट बाल हुने यौन दुर्व्यवहार घट्नालाई समेट्नु पर्नेमा सबैको ध्यानाकर्षण गराएको थियो ।
इलाका प्रहरी कार्यालय धरानको प्रहरी नायब उपरीक्षक प्रकाश जबेगुले धरानमा २०८१/०८२ को  पुस महिना सम्म ३ वटा साइबर अपराधको मुद्दा कानुनी प्रक्रियामा रहेको जानकारी दिए ।
उनका अनुसार त्यस मध्ये १ सामाजिक सञ्जालको माध्यमबाट बाल यौन दुर्व्यवहार सम्बन्धी मुद्दा कानुनी प्रक्रियामा छ । डिएसपी जबेगुले भने ‘पछिल्लो समय इन्टरनेटको दुरुपयोगबाट बालबालिकाहरू सहित सबैलाई असर गरिरहेको छ ।’
प्रमुख अतिथि धरान उपमहानगरपालिकाको उपप्रमुख आईन्द्र विक्रम बेघाले बढ्दो इन्टरनेटको प्रयोग सँगै तीव्र गतिमा युवा बालबालिका बृद्धवृद्धाले समेत सामाजिक सञ्जाल दुरुपयोग गरिरहेको बताए । उनले भने ‘सरकारले कानुन बनाउन विधेयक पेस गरेको छ, दुरुपयोग गर्नेलाई सजाय हुनुपर्छ ।’
भ्वाइस अफ चिल्ड्रेन साइबर सेफ्टी परियोजना अधिकृत लीला भुजेलले अनलाइनबाट हुने यौन दुर्व्यवहार र शोषणका घटनाहरू बढ्न थालेपछि बालबालिकाको पढाइ, बानी व्यवहार, मानसिक तथा शारीरिक स्वास्थ्य, परिवारमा बेमेल, बालबालिका घर छोडेर हिँड्ने लगायतको समस्या हुने गरेको बताए ।
समाजमा उत्पन्न समस्याको रोकथामका लागि नीति नियमहरू कम भएको र प्रभावकारी नभएकाले संस्थाले अनलाइन बाल यौन दुर्व्यवहार रोकथामको परियोजना सञ्चालनमा ल्याएको उनले जानकारी दिए ।