चतरा : सुनसरी क्षेत्र नम्बर ४ बाट विजयी भएका नेपाली काँग्रेसका ज्ञानेन्द्रबहादुर कार्की हालको सङ्घीय सरकारको प्रवक्ता एवम् सञ्चार तथा सूचना प्रविधि मन्त्रीको जिम्मेवारीमा छन् । कार्की राष्ट्रिय राजनीतिमा प्रभाव राख्ने सरल नेताको रूपमा परिचित छन् । 

निर्वाचन मार्फत राष्ट्रिय राजनीतिमा आफ्नो प्रभावलाई अझै बढाउने योजनामा छन् कार्की । २०७४ को निर्वाचनमा एमाले उम्मेदवार रमेश श्रेष्ठलाई फराकिलो मतान्तरले पराजित गरेका कार्कीले यस पटक प्रदेश मन्त्री समेत भएका जगदीश प्रसाद कुशियैत सँग प्रतिस्पर्धा गर्नुपर्ने भएको छ । जसपा सँगको गठबन्धनको कारण कार्कीलाई विगतको तुलनामा केही चुनौतीपूर्ण देखिन्छ ।  
अघिल्लो निर्वाचनमा केन्द्रमा प्रभावशाली नेता खोजेका स्थानीयले कार्कीको विजयले धेरै विकाशको अनुभूत पनि गर्न पाएका छन् । कार्कीले यस बिचमा सडक, बिजुली सार्वजनिक भवन लगायत पूर्वाधार निर्माण मार्फत जनतामा जोडिएको कारण उनी विजयी बन्नेमा काँग्रेस कार्यकर्ता विश्वस्त छन् । माओवादी केन्द्र वराहक्षेत्र-७ का वडाध्यक्ष जगन बजगाईँ कार्कीको लोकप्रियता बढेको कारण जित निश्चित भएको तर्क गर्छन् । 
स्वतन्त्र उम्मेदवार डाक्टर खालिद हुसेनको कारण मुस्लिम मत प्रभावित हुने देखिएको छ । जसको कारण कार्कीलाई दबाब पर्ने आङ्कलन गरिएको छ । डा.हुसेन जसपाका नेता भएको कारण कुसियैतको धेरै मत काटिने काँग्रेस कार्यकर्ताको तर्क छ । प्रभावशाली प्रतिस्पर्धी र गठबन्धन भित्रको दल जसपाका नेता समेत रहेका मुस्लिम समुदायमा प्रभावशाली रहेका डा. हुसेनको उम्मेदवारीले कुसियैतलाई झनै कठिन पर्ने देखिन्छ ।
२०६४ सालको पहिलो संविधानसभाको निर्वाचनमा सुनसरी ६ वटै क्षेत्रमा काँग्रेस निल भएको थियो । मधेसी अधिकार फोरम नेपालले ३, नेकपा माओवादीले १ र एमालेले २ वटा क्षेत्रमा विजय हासिल गरेका थिए । २०७० सालमा  काँग्रेसले १ स्थानमा खाता खोल्यो । राज्य पुनर्संरचना पछि ४ क्षेत्रमा समेटिएको सुनसरीमा काँग्रेसले ३ वटा सिट जित्यो । वाम गठबन्धनका बिचमा पनि चुनाव जितेका नेताहरू मध्ये पर्ने कार्की पुनः विजयी हुने रणनीतिमा छन् । 
मङ्सिर ४ मा हुने प्रतिनिधिसभा र प्रदेशसभा निर्वाचनमा सत्ता गठबन्धन अन्तरगत सुनसरीका ३ निर्वाचन क्षेत्र कांगेसको भागमा परेको छ । १ नम्बर क्षेत्रमा माओवादीका मुक्साहाङ मेन्याङबो उम्मेदवार भएका छन् । 
गत स्थानीय तहको निर्वाचनमा काँग्रेसले क्षेत्र नं.४ मा पर्ने चार वटै स्थानीय तह जितेको थियो । त्यस बाहेक माओवादी केन्द्र र नेकपा एकीकृत समाजवादीको मतले काँग्रेसलाई बलियो बनाएको छ । एमाले सँग जोडिएको जसपाको कारण आगामी निर्वाचनमा काँग्रेस कडा प्रतिस्पर्धा हुने प्रस्ट छ ।