_1735354691.gif)
धरान : पूर्वको महत्त्वपूर्ण शैक्षिक हबको रूपमा परिचित धरानको महेन्द्र बहुमुखी क्याम्पस राजनीतिक नेतृत्वको कारखाना नै हो । महेन्द्र क्याम्पसबाट राजनीतिमा उदाएका नेताहरू मेयर सांसद हुँदै पार्टीका उच्च तहमा पुगेका छन् । धरानको नेतृत्व जन्माउने महेन्द्रमा लामो समय एमाले निकट अनेरास्ववियु र जनता समाजवादी निकट समाजवादी विद्यार्थी युनियनले नेतृत्व गर्यो ।
नेपाली काँग्रेस निकट नेपाल विद्यार्थी सङ्घ (नेविसङ्घ)ले २६ वर्षपछि नेतृत्व गर्ने अवसर पाएको छ । चैत ५ गते (मङ्गलवार) सम्पन्न निर्वाचनको परिणाम अनुसार नेविसङ्घका प्रशान राई स्ववियु सभापतिमा निर्वाचित भए । यसअघि २०५५ सालमा नेविसङ्घको तर्फबाट मुकेश थापाले सभापतिमा विजयी हासिल गरेका थिए । थापा पछि नेविसङ्घको तर्फबाट पहिलो पटक नेतृत्व गर्ने अवसर राईलाई मिलेको हो ।
आन्तरिक एकता कायम गर्न नसकेपछि झिनो मतान्तरले पराजित हुँदै आएको नेविसङ्घमा यसपटक बलियो एकता देखियो । स्थानीय नेता, नेविसङ्घ जिल्ला तथा केन्द्रीय प्रतिनिधिको सक्रियता र अनेरास्ववियु सँगको गठबन्धनले नेविसङ्घलाई नेतृत्वमा पुर्याएको हो ।
२०७९ सालको स्ववियु निर्वाचनमा काँग्रेस पार्टीको आन्तरिक असमझदारीको कारण सभापतिका उम्मेदवार विनोद आले पराजित भए । समाजवादी विद्यार्थी युनियनका युवराज राई (अलौकिक)ले आलेलाई पराजित गरे । उनै युवराजलाई पराजित गर्दै प्रशानले नयाँ इतिहास बनाएका हुन् ।
२०५५ पछि २०५७ मा नेविसङ्घका सुमन थापामगर अनेरास्ववियुका विदुर लिम्बूसँग पराजित भए । लिम्बू हाल कोशी प्रदेशसभा सदस्य छन् । २०६० को निर्वाचनमा हालका काँग्रेस धरान नगर सभापति श्याम पोखरेल प्रकाश राईसँग पराजित भए । राई हाल राष्ट्रसेवक कर्मचारीका रुपमा कार्यरत छन् ।
२०६२ मा नेविसङ्घका ज्ञानेन्द्र रुम्दाली विवेक सुब्बासँग पराजित भए । रुम्दाली तरुण दल ओखलढुङ्गाका सभापति हुँदाहुँदै विद्रोही उम्मेदवार बनेर मानेभञ्ज्याङ गाउँपालिकाको अध्यक्ष निर्वाचित भएका छन् । त्यसपछि लामो समय स्ववियु निर्वाचन भएन । २०७३ मा इकाई सभापति टकेन्द्र राई सागर सरगम चेम्जोङसँग पराजित बने ।
महेन्द्र क्याम्पसकै विद्यार्थी राजनीतिबाट उदाएका उमेश थापा हाल काँग्रेस कोशी प्रदेश महामन्त्री छन् । काँग्रेसका नेता सुवास राई, भोजराज न्यौपाने, पूर्व मेयर तिलक राई, क्षेत्रीय सभापति सुजेन्द्र गोले, नगर सचिव जितेन्द्र राई, हिमाल श्रेष्ठ लगायतका नेताहरू नेविसङ्घकै उत्पादन हुन् ।
२०३६ सालमा स्थापना भएको महेन्द्र बहुमुखी क्याम्पसको पहिलो सभापति अनेरास्ववियुका भक्त बहादुर राई हुन् । त्यसपछि निरन्तर भीम राई, चण्डी राज राई, नारायण प्रसाद राई, चन्द्र कुमार राई, उपेन्द्र बहादुर कोरङ्गी, टङ्क राई, शिव कुमार राई र सिंह बहादुर लिम्बू स्ववियु सभापति बनेका थिए । त्यसपछि मुकेश थापाले नेविसङ्घको खाता खोले पनि निरन्तर विजयी इतिहास बनेन । यसपटक भने प्रसान राईको नेतृत्वमा स्ववियु कमिटी गठन भएको छ ।
_1664681437.jpg)
