_1735354691.gif)
वराहक्षेत्र : अव्यवस्थित बसोबास, भूमिहीन दलित र भूमिहीन सुकुम्वासी परिवारलाई लालपुर्जा वितरण गर्ने विषय, अवस्था र नगरपालिकाले गरेको कामको र योजनाको विषयमा वराहक्षेत्र नगरपालिकाले भूमि समस्या समाधान आयोग सुनसरीका पदाधिकारीसँग छलफल गरेको छ ।
बिहीबार नगर प्रमुख तथा नगर स्तरीय भूमिहीन तथा सुकुम्वासी तथा अव्यवस्थित समस्या समाधान समन्वय समितिका संयोजक रमेश कार्कीको अध्यक्षता तथा भूमि समस्या समाधान आयोग सुनसरीका अध्यक्ष इन्द्र पोखरेलको प्रमुख अतिथ्यतामा अव्यवस्थित बसोबास, भूमिहीन दलित र भूमिहीन सुकुम्वासीलाई लालपुर्जा वितरण गर्ने विषयमा छलफल भएको हो ।
छलफल कार्यक्रममा नगर उप-प्रमुख नन्दकुमारी सुनुवार, प्रमुख प्रशासकीय अधिकृत गणेश बहादुर कटुवाल, भूमि समस्या समाधान आयोग सुनसरीका विज्ञ सदस्य शैलेन्द्र कुमार राई, सदस्य अनु गुरुङ, वडा नं १ का अध्यक्ष किसन थापामगर, वडा नं २का अध्यक्ष होमप्रसाद गौतम, वडा नं ३ का अध्यक्ष राजदिप लामा, वडा नं ४ का अध्यक्ष आशाराम चौधरी, वडा नं ६ का अध्यक्ष उद्धव पोखरेल, वडा नं ७ का अध्यक्ष कपिल आचार्य, वडा नं ८ का अध्यक्ष रोशन खड्का, वडा नं ११ का अध्यक्ष कृष्ण कुमार महताे, नगर स्तरीय भूमिहीन तथा सुकुम्वासी तथा अव्यवस्थित समस्या समाधान समन्वय समितिका सदस्य हरिकृष्ण भट्टराई, लंकमान बिक, अर्जुन भट्टराई, चन्द्र मगर, अनिरुद्र मण्डल लगायत नगरपालिका अमिनहरूको उपस्थिति रहेको थियो ।
वराहक्षेत्रका अव्यवस्थित बसोबास, भूमिहीन दलित र भूमिहीन सुकुम्वासीलाई लालपुर्जा वितरण गर्ने तत्कालीन राष्ट्रिय भूमि आयोगको प्राथमिकतामा परेर तीव्र रूपमा काम भए पनि वन ऐन र नापी शाखाबाट आवश्यक काम हुन नसक्दा लालपुर्जा वितरण गर्न रोकिएको नगर प्रमुख कार्कीले बताए । उनले हाल बनेको भूमि समस्या समाधान आयोगले वन ऐन र नापी शाखासँग समन्वय गरेर वराहक्षेत्र नगरपालिकालाई प्राथमिकतामा राखेर काम गर्न भूमि समस्या समाधान आयोग सुनसरीका पदाधिकारीहरूलाई आग्रह गरे ।
लाल पुर्जाको आशामा रहेका अव्यवस्थित बसोबास, भूमिहीन दलित र भूमिहीन सुकुम्वासी नगरबासीहरूलाई लाल पुर्जा वितरण गर्न वन ऐन बनेको नगर प्रमुख रमेश कार्कीले बताए ।
अव्यवस्थित बसोबास, भूमिहीन दलित र भूमिहीन सुकुम्वासी परिवारलाई लालपुर्जा वितरणका लागि वराहक्षेत्र नगरपालिकाले प्राथमिकतामा राखेर काम गरेको र वराहक्षेत्र नगरपालिकालाई प्राथमिकतामा राखेर भूमि समस्या समाधान आयोग सुनसरीले काम गर्ने अध्यक्ष इन्द्र पोखरेलले प्रतिबद्धता व्यक्त गरे ।
वराहक्षेत्र नगरपालिकामा भूमिहीन दलित १ सय २० परिवार, भूमिहीन सुकुम्वासी २ हजार ८ सय ८४ परिवार, अव्यवस्थित बसाेवासी ६ हजार ८ सय ३९ परिवार गरी १० हजार ५ सय ९३ परिवारले आवेदन दिएका थिए । त्यस्तै स्पष्ट नभएका आवेदन फम २ सय ६७ रहेको छ ।
वराहक्षेत्र नगरपालिकाले तत्कालीन राष्ट्रिय भूमि आयोग सुनसरीसँग समन्वयमा वडा नं ७ को देबिघाटलाई केन्द्र मानेर निक्सा वितरण, नाप नक्सा गरिएको कित्ता लगायतका काम भएको थियो ।
_1664681437.jpg)
