धरान: नेपालीहरुको घरघरमा चाड तिहार भित्रिसकेको छ । घर, आँगन, चोकहरु सबै बत्तिले झिलिमिलि छ । आज साँझ लक्ष्मीपूजा हुदैछ, र महिला दिदीबहिनी, देउसे टोलीहरु भैलो एवं देउसी खेल्न पनि निस्कनेछन् ।
यता धरानको महोल भने अलि फरक छ । यहाँ तिहारको मात्र होइन, आगामी मंसिर १४ गते हुने मेयरको उपनिर्वाचनको पनि रौनक छाएको छ । सर्वसाधारणहरु तिहार मनाउने जोरजाम गरिरहदा राजनीतिक दलहरु भने चुनावी अभियानमा ब्यस्त छन् । उम्मेदवार घोषणा र चुनावी प्रचारप्रसारमा उनीहरुको ब्यस्तता बढ्दो छ । प्रमुख प्रतिपक्षी दल नेपाली कांग्रेसका उम्मेदवार तिलक राईले घरदैलो अभियान थालिसकेका छन् । कांग्रेस धरान उपमहानगर कमिटिका सभापति राईलाई पार्टीले सर्वसम्मत उम्मेदवार सिफारिश गरेको थियो ।
उम्मेदवार राईले हिजो शनिबारदेखि घरदैलो अभियान थालेका हुन् । प्रसिद्ध एवं पवित्र धार्मिकस्थल रहेको धरान वडा नं २० विष्णुपादुकाबाट उनले घरदैलो थालेका हुन् । हिजो पहिलो दिन तामाखाम, बाघखोप, चिण्डे डाँडा, बन्दुके र टोड्केलगायत क्षेत्रमा उनले मतदाताहरु घरलौरी भेटेका थिए । आज पनि विष्णुपादुका मन्दिर क्षेत्रमा घरलौरी मतदाता भेट्ने र सुझाव पनि संकलन गर्ने काम भइरहेको उम्मेदवार राईले बताए । ‘आज सुलिकोट, चिउरीबोटे, कोकाह पारी विष्णुपादुका मन्दिर क्षेत्रमा मतदाताहरु भेटिरहेको छ,’मोवाइल सम्पर्कमा उनले भने,‘घरलौरी नै पुगेर मतदाताहरुसँग भोट मागिइरहेका छौं, सुझाव पनि लिदैछौं ।’
मतदाताहरु निराश
कांग्रेस उम्मेदवार राईका अनुसार घरदैलोको क्रममा भेट माग्न जादा मतदाताहरुले निराशा प्रकट गर्दै भोट हाल्न नजाने अभिव्यक्ति दिइरहेको पनि बतए । तत्कालिन एमालेलाई जिताए पनि वाचा पुरा नगरेको भन्दै मतदाताहरु यसपाली भोट नै हाल्न नजाने बताइरहेका छन् । ‘कतिले त भोट हाल्नै जादैनौ भने । एमालेले जितेपछि गछौं भनेको वाचा पुरा गरेन, भोट दिएर पनि केही नहुदो रहेछ भन्छन्,’उनले भने,‘हामीले सम्झाइ बुझाइ गरेर त्यस्तालाई भोट नदिएर सजाय दिनुस्, र यसपाली हामीलाई जिताउनुस्, हामी काम गरेर, वाचा पुरा गरर देखाउछौं । हामीलाई विश्वास गर्नुस् भनेर भनिरहेका छौं ।’
