_1749430366.gif)
इटहरी : इटहरी लगायत पूर्वका पाँच सहरका सञ्चालित गोरखा डिपार्टमेन्ट स्टोरको सम्पत्ति लिलामी सम्बन्धी सूचना प्रकाशित भएको छ ।
हिमालयन बैङ्क लिमिटेड केन्द्रीय कार्यालय काठमाण्डौले ब्लाष्ट टाइम्स दैनिक पत्रीकामा सूचना प्रकाशित गर्दै साँवा, ब्याज र जरिवाना भुक्तानी गर्न आग्रह गरेको हो ।
पटक पटक लिखित तथा मौखिक ताकेता गर्दा समेत बेवास्ता गरेको हुँदा ३५ दिन अर्थात् २०८२ माघ ३ गते भित्रमा भुक्तानी नभए कालोसूचीमा राखेर लाेन असुल उपर गर्ने बैङ्कको सूचनामा उल्लेख छ ।
इटहरी, बक्लौरी, कानेपोखरी, केरौन, खोटाङको चिउरीडाँडा, हाँसपोसा, एकम्बा लगायत ठाउँमा रहेका ४२ वटा कित्ता जग्गाको लिलामी प्रक्रिया बैंकले सुरु गरेको हो । सञ्चालक बलराम आचार्यले प्रयोग गर्ने गाडी ट्वेटा ल्याण्डक्रुल्सर, टाटाको इन्ट्रा र कियाको सेल्टोस गाडीलाई समेत लिलामी प्रक्रियामा राखिएको छ ।
कम्पनीको प्रोप्राइटर तथा जमानीमा संलग्न रहेको भन्दै अन्जु आचार्य खत्री सहित जमानी बस्ने सन्तोष आचार्य, सुशील आचार्य र बलराम आचार्य स्वयम्को नाममा सूचना जारी गरिएको हो ।
लामो समयदेखि थलिएको गोरखा डिपार्टमेन्ट स्टोरले बैङ्कको ब्याज बुझाउन नसकेपछि लिलामी प्रक्रियामा पुगेको हो । जग्गा कारोबारमा मन्दी आएपछि व्यापारिक रूपमा थलिएका बलराम आचार्य पूर्वका प्रख्यात व्यापारी हुन् ।
पूर्वमा डिपार्टमेन्ट स्टोरको खोलेर सपिङ कल्चर स्थापित गरेका उनलाई आफ्नै सम्पत्ति जोगाउन सकस परेको छ ।
