_1749430366.gif)
धरान : कालंगा हाइड्रो लिमिटेड ले आज (मङ्गलवार) देखि प्रारम्भिक सार्वजनिक निष्कासन (आइपिओ) खुला गरेको छ। कम्पनीले पहिलो चरणमा आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपालीहरूलाई लक्षित गर्दै सेयर बिक्री सुरु गरेको हो।
कम्पनीले आफ्नो १ अर्ब ४० करोड रुपैयाँ जारी पुँजीको ३५ प्रतिशत बराबर ४९ करोड रुपैयाँको ४९ लाख कित्ता सेयर निष्कासन गर्ने अनुमति पाएको छ। यसमध्ये १४ करोड रुपैयाँ बराबरको १४ लाख कित्ता सेयर आयोजना प्रभावित क्षेत्रका स्थानीयका लागि छुट्याइएको छ।
अति प्रभावित क्षेत्रअन्तर्गत बझाङ जिल्ला का केदारस्यूँ गाउँपालिका (वडा ४ र ५), बित्थडचिर गाउँपालिका (वडा ६ र ८), बुंगल नगरपालिका (वडा ३, ४, ५, ६ र ८), बैतडी जिल्ला को डिलासैनी गाउँपालिका (वडा १ र २) तथा दार्चुला जिल्ला को शैल्यशिखर नगरपालिका (वडा १) का बासिन्दाहरूलाई ९ लाख १० हजार कित्ता सेयर छुट्याइएको छ।
त्यसैगरी, अन्य प्रभावित क्षेत्रका बासिन्दाका लागि ४ लाख ९० हजार कित्ता सेयर बिक्री गरिनेछ।
यस्तै, सर्वसाधारणका लागि छुट्याइएको सेयरमध्ये १० प्रतिशत अर्थात् ३ लाख ५० हजार कित्ता सेयर वैदेशिक रोजगारीमा रहेका नेपालीहरूका लागि निष्कासन गरिएको छ। उनीहरूले प्रति कित्ता १०० रुपैयाँका दरले आवेदन दिन सक्नेछन्।
आइपिओमा न्यूनतम १० कित्ता र अधिकतम २० हजार कित्तासम्म आवेदन दिन सकिनेछ। स्थानीय बासिन्दाहरूका लागि आवेदन अवधि छिटोमा चैत २४ गते र ढिलोमा वैशाख ९ गतेसम्म रहनेछ भने वैदेशिक रोजगारीमा रहेका नेपालीहरूले चैत १५ गतेसम्म आवेदन दिन सक्नेछन् (आवेदन नपरेमा अवधि चैत २४ सम्म लम्बिन सक्नेछ)।
कम्पनीलाई केयर रेटिङ नेपाल ले ‘केयर एनपी डबल बी इस्युअर’ रेटिङ प्रदान गरेको छ, जसले कम्पनीमा मध्यम जोखिम रहेको संकेत गर्दछ।
सेयर निष्कासन तथा बिक्री प्रबन्धकका रूपमा सानिमा क्यापिटल रहेको छ। स्थानीय बासिन्दाहरूले विभिन्न बैंकका शाखा तथा आयोजनास्थल कार्यालयबाट आवेदन दिन सक्नेछन् भने वैदेशिक रोजगारीमा रहेका नेपालीहरूले सी–आस्बा प्रणालीमार्फत बैंक तथा वित्तीय संस्था वा मेरो सेयर प्रयोग गरेर अनलाइन आवेदन दिन सक्नेछन्।
