_1735354691.gif)
पथरी : सुख्खा मौसम सुरु भएसँगै वन, जङ्गलमा आगलागी भई डढेलो फैलिने खतराप्रति वन उपभोक्ता समितिहरूलाई सचेतता अपनाउन आग्रह गरिएको छ ।
सामुदायिक वन उपभोक्ता महासङ्घ पथरीशनिश्चरेद्वारा सोमवार आयोजित सचेतना कार्यक्रममा वन, जङ्गलमा हुने आगलागी र त्यसले पुर्याउने क्षतिका बारेमा समितिहरूलाई अनुशिक्षण दिएको छ ।
महासङ्घले डढेलो तथा आगलागी नियन्त्रणप्रति सचेतना बढाउन साताव्यापी कार्यक्रम बिच शान्ति सामुदायिक वनमा अनुशिक्षण दिएको हो ।
अनुशिक्षणमा डाँस मोरङगी सामुदायिक वन, शान्ति सामुदायिक वन, मनकामना सामुदायिक वन लगायत ११ वटा सामुदायिक वन साथै कञ्चनजङ्घा दैवि प्रकोप व्यवस्थापन समितिका पदाधिकारी सदस्यहरू सहभागी थिए ।
सोही अवसरमा पथरीशनिश्चरे–१० स्थित मनकामना सामुदायिक वनबाट वन उपभोक्ताहरूको र्याली निकालियो । डढेलो रोकथामका प्लेकार्ड सहित निस्कीएको र्याली प्रदर्शन गरिएको हो ।
पर्यटकीय स्थल शान्ति भुल्के सिमसारमा भएको कोणसभामा उपभोक्ता महासङ्घ मोरङका कार्यवाहक अध्यक्ष मदन पोख्रेलले अबको मौसममा डढेलो तथा आगलागीका घटना बढ्ने हुनाले सजग हुन आग्रह गरे ।
घटना रोकथामका कार्यमा उपभोक्ताहरू सबैको हातेमालो आवश्यक रहेको उनले बताए ।
फेकोफन प्रदेश सदस्य अग्नि पौडेलले वन डढेलो रोकथामका लागि स्थानीय उपभोक्ताको भूमिका महत्त्वपूर्ण रहेको बताए । कार्यक्रममा डढेलो नियन्त्रण गर्ने उपायसहितको डेमो समेत प्रदर्शन गरिएको थियो ।
_1664681437.jpg)
