_1735354691.gif)
धरान : कोशी प्रदेशका मुख्यमन्त्री हिक्मतकुमार कार्कीले प्रदेशको हिमाली र पहाडी जिल्लाहरूमा सामुदायिक विद्यालयहरूको भवन जीर्ण अवस्थामा रहेको तथा छात्रावासको अभाव समेत रहेकोले प्रदेश सरकार शिक्षामा भौतिक पूर्वाधारलाई प्राथमिकता दिएर अघि बढेको बताएका छन् ।
उनले भने ‘यसमा केन्द्र सरकारको सहयोग भए नयाँ भवनहरू बनाउने योजनामा प्रदेश सरकार रहेको छ ।’ आउँदो वर्ष देखि प्रदेश सरकारको तर्फबाट बजेट विनियोजन गरेर शैक्षिक क्षेत्रमा विकासलाई प्राथमिकता दिइने उनको भनाई छ ।
धरान स्थित पब्लिक हाई स्कुलको ७८औँ वार्षिकोत्सव समारोहमा प्रमुख अतिथि मुख्यमन्त्री कार्कीले भने भने ‘हिमाली र पहाडी जिल्लाहरूमा विद्यालय भवन जीर्ण छ, छात्रावासको अभाव छ ।’
मुख्यमन्त्रीले अहिले प्रदेश सरकारसँग बजेट अभाव भएकोले आउँदो बजेटमा विद्यालयको भौतिक पूर्वाधार सहित शिक्षाको लागी नयाँ बजेट र नीति तर्जुमा गरिने बताएका हुन ।
उनले सामुदायिक विद्यालयले चाहेमा संस्थागत स्कुलको भन्दा राम्रो नतिजा ल्याउन सक्ने बताउँदै भने ‘अहिलेको सामुदायिक विद्यालयहरू नाजुक अवस्थामा रहेको बेला पब्लिक हाई स्कुल अगाडी रहनु गौरवको कुरा हो ।’
उक्त अवसरमा बिद्यार्थीहरुले बनाएको विज्ञान तथा हाते सामग्रीहरू सहित शैक्षिक सामाग्रीहरूका ३३ वटा स्टलहरूमा गरिएको प्रदर्शन मुख्य मन्त्री कार्कीले अवलोकन गरेका थिए ।
कार्यक्रममा कोशी प्रदेशसभा सदस्यद्वय यशोदा कायस्थ,रमेश बस्नेत र विजय कुमार राई लगायत सहभागी थिए ।
प्रधानाध्यापक डा. इन्द्र मोहन झाका अनुसार स्कुलमा प्राईमारी देखि १२ कक्षा सम्म कुल ३४ सय विद्यार्थीहरू छन् । धरानको सामुदायिक विद्यालयहरू मध्ये प्राईमारी देखि नै अङ्ग्रेजी माध्यममा पठनपाठन हुने पहिलो विद्यालय भएको उनले बताए ।
सोही अवसरमा मुख्यमन्त्री कार्कीले स्कुलको विज्ञान र व्यवस्थापन संकायको बेग्ला बेग्लै भवनको उद्घाटन गरे ।
_1664681437.jpg)
