धरान : राष्ट्रिय स्वतन्त्र पार्टी सुनसरी क्षेत्र १ को सचिवमा धरान १२ का विमल शाक्य मनोनीत भएका छन् । उनी गत वर्ष भदौ २४ गते धरानमा भएको तोडफोडमा आरोपितहरू मध्ये एक हुन ।
नेकपा एमाले धरानले इलाका प्रहरी कार्यालयमा दिएको जाहेरीमा भदौ २४ गते नेकपा एमाले पार्टी कार्यालय तोडफोड हुँदा उनी ढुङ्गा हान्नेहरू मध्येमा थिए । आगजनी समेत भएको उक्त घट्नामा ढुङ्गा हानेको भिडियो सार्वजनिक भएको थियो ।
रास्वपाको जिल्ला अधिवेशनबाट सुनसरी १ को सभापतिमा राजकुमार विष्ट निर्वाचित भएका छन् । उनको कार्यसमितिमा शाक्य सचिवमा मनोनीत भएका हुन । उपसभापतिमा लोकबहादुर तामाङ र सचिवमा शाक्यलाई मनोनीत गरिएको छ ।
छापाखाना व्यवसायी तथा पूर्व पत्रकार शाक्य बुद्ध धर्मको विपश्यना ध्यानका प्रशिक्षक हुन । भदौ २४ गते शाक्यले घटनाबारे स्पष्टीकरण दिँदै पत्रकार सम्मेलन आयोजना गरी बालबालिकाको हत्या भएको घटनाबाट आवेशमा आएर आक्रोश स्वरूप एउटा सानो ढुङ्गा हानेको बताएका थिए ।
त्यसबाहेक विरोध आन्दोलन र त्यससँग सम्बन्धित अन्य कुनै पनि घटनामा आफ्नो कुनै संलग्नता नभएको उनको भनाई थियो ।
