_1749430366.gif)
धरान: नेपालमा लोडसेडिङ अन्त्य गरेर बहुचर्चित बनेका कुलमान घिसिङ वर्तमान अन्तरिम सरकोको ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकास मन्त्रीको रूपमा आज आइतबार धरान आउँदा आकर्षणको विषय बने ।
उनको ५ वटा मन्त्रालयसँग सम्बद्ध स्थानीय समस्याहरू समाधानका लागि सरोकारवालाले आशा र विश्वास गर्नु अस्वाभाविक होइन ।
मन्त्री घिसिङ सहभागी धरानको दुई सार्वजनिक कार्यक्रममा सरोकारवालाहरूले ज्ञापन पत्र, सामूहिक छलफलमा समस्याहरू राख्दै समाधानको माग गरेका छन् ।
त्यस मध्ये धरानमा हाईटेन्सन प्रसारण लाइनका कारण मानवीय क्षति हुने सम्भावनाको विषयलाई उनले गम्भीर रूपमा लिए ।
मन्त्री घिसिङले धरान–१५ ङाग्युर ञिङ्गा ङ्युङने ल्हाखाङ गुम्बामा आयोजित बज्रगुरु जप,विश्व शान्तिपूजामा स्थानीय सरोकारवालासँग छलफल गरे ।
उनले भने ‘धरान उपमहानगरपालिकाले सहयोग गरे विद्युत् प्राधिकरण समस्या समाधान गर्न तयार छ, भोली देखिनै प्राधिकरणको टोलीलाई सर्वेमा पठाउँछु ।’ यदि हाई–टेन्सन लाइनले मानवीय क्षति पुर्याउने खतरा देखिएमा प्रक्रिया पूरा गरी रि–रूट गर्न पनि आफू तयार रहेको तर नयाँ ठाउँमा लाइन जडान गर्दा विरोध गर्न नहुने उनले बताए ।
मन्त्री घिसिङले धरानको समस्या समाधान गर्न आफूसँगै सडक विभाग, सिँचाइ तथा सहरी विकासका अधिकारी समेत आएको बताउँदै भने ‘धरानको समस्या समाधानका लागि बहु–क्षेत्रीय टोलीले भोलिमै विस्तृत सर्वे गर्छ ।’
मन्त्री घिसिङले जेनजी आन्दोलनपछि बनेको अन्तरिम सरकारको मूल दायित्व तत्काल समस्या समाधान गर्दै निर्वाचनको वातावरण तयार गर्नु भएको बताए ।
उनले सरकारले कारबाही गरेर मलाई पदबाट हटायो, जनताले विश्वास गरे त्यो भन्दा ठुलो जिम्मेवारी दिएको बताउँदै भने ‘देशको सही नेतृत्व लिन तयार गर्दै आएको छु ।’
मन्त्री घिसिङले भने ‘देश बत्तीको उज्यालोले मात्र बन्दैन, मन–मस्तिष्कको उज्यालोले बदलिन्छ ।’ राष्ट्र निर्माणको वास्तविक आधार मानिसको सोच, चरित्र र क्षमता हो । प्राधिकरण प्रमुख हुँदा ८ सय मेगावाट रहेको ऊर्जाको विकास ४ हजार मेगावाट पुर्याएको ८३ हजार मेगावाट क्षमताका हाइड्रोपावर सुरु गरेको बताए ।
प्रमुख हुँदा ५ वटा ट्रान्समिसन सुरु गरेकामा हाल ३ वटा सुरुवात भएकोमा भदौ महिना देखि ४ महिनामा १८ अर्ब रुपयाको विद्युत् भारतलाई बेचेको बताए । उनले बढी भएको विद्युत् खेर फाल्ने होइन बेच्ने हो भन्दै ‘भारतमा बिद्धुत बचेर राष्ट्रघाती गर्यो भन्नेहरू आफै राष्ट्रघाती’ भएको बताए ।
मन्त्री घिसिङले राजनीतिक नेतृत्वबारे टिप्पणी गर्दै भने ‘सही समयमा सही व्यक्ति प्रधानमन्त्री नभएसम्म देश चल्दैन, ७५ वर्षको अनुभवले देखायो राजनीतिक परिवर्तनले मात्र देश बन्दैन रहेछ ।’ उनले अगामी निर्वाचन ठुलो मौका भएको बताउँदै जनताले सही नेतृत्व छान्न सक्नुपर्ने आग्रह गरे ।
उनले देश समृद्ध बनाउन ‘न्यु मेनस्ट्रीम फोर्स’को निर्माण आवश्यक रहेको बताउँदै भने ‘न्यु स्ट्रीम फोर्स निर्माण गरेर मात्र आगामी निर्वाचन पछिको ५ बर्षे सरकारले जनताका माग सम्बोधन गर्न सक्छ ।’
धरानका नगरप्रमुख हर्क साम्पाङलाई लक्षित गर्दे घिसिङले भने ‘फस्ट्रेशनको कुरा मात्र गरेर अव सरकारमा पुग्न सकिँदैन ।’ सकारात्मक अभिव्यक्तिले मात्र सहअस्तित्व स्वकार हुने उनको भनाई छ ।
उनले भने ‘नयाँ शक्तिले एक अर्कालाई लाञ्छना लगाउने मात्र गर्नु हुँदैन ।’आगामी निर्वाचन परिवर्तनको लागि ठुलो मौका भएको बताउँदै मन्त्री घिसिङले भने ‘नयाँ शक्ति, वैकल्पिक शक्ति र परिवर्तन चाहने शक्तिहरू एकजुट हुनुपर्छ, सही नेतृत्व छानियो भने ५ वर्षमै जनता माग भन्दा बढी काम हुन्छ ।’
यसै बिच सुधार नेपालद्वारा हरियाली सामुदायिक वनमा आयोजित अन्तरक्रिया कार्यक्रममा मन्त्री घिसिङलाई धरानका समस्याहरूको समाधान निम्ति विभिन्न सङ्घ–संस्थाले १४ वटा ज्ञापन पत्र बुझाएका छन् ।
