_1749430366.gif)
धरान : सुर्खेतमा बालिका इनिशा बिकको बलात्कारपछि हत्या भएको जघन्य घटनामा संलग्न दोषीहरूलाई कानुनको दायरामा ल्याई कडा कारवाहीको माग गर्दै शुक्रवार धरानमा विरोध प्रदर्शन गरिएको छ ।
धराने युवाको आयोजनामा नागरिक समाज, युवा युवती तथा सर्वसाधारण प्रदर्शनमा स्वतःस्फूर्त सहभागी भएका थिए ।
‘बलात्कार र हत्याका विरुद्ध हाम्रो आवाज’ मूल नारा सहित सडकमा उत्रिएका प्रदर्शनकारीहरूले दोषीलाई कडाभन्दा कडा कारबाही गर्न र पीडितलाई न्याय दिलाउन माग गरेका छन्।
प्रदर्शनका क्रममा सहभागीहरूले बोकेको मुख्य ब्यानरमा ‘खबरदारी र्याली’ लेखिएको थियो। उनीहरूले निर्दोष बालिकालाई न्याय दिनुका साथै यस्ता जघन्य अपराधमा संलग्नलाई कडा कानुनी कारबाहीको दायरामा ल्याउन जोड दिएका थिए।
र्यालीमा सहभागीहरूले महिला तथा बालबालिकाका लागि सुरक्षित समाज निर्माण गर्न राज्यले प्रभावकारी कदम चाल्नुपर्ने माग गरेका छन्।
उनीहरूले “स्टप रेप”, “ वि वान्ट जस्टिक” र “बलात्कारीलाई फाँसी दे” लेखिएका प्लेकार्डसमेत प्रदर्शन गरेका थिए।
धरान उपमहानगरपालिकाको कार्यालय अगाडि चतरा लाइनबाट सुरु भएको र्याली छाता चोक हुँदै भानुचोकमा पुगेर कोणसभामा परिणत भएको थियो।
कृष्ण राईको संयोजकत्वमा आयोजित र्यालीपछि भएको कोणसभामा मृतक बालिकाको आत्माको शान्तिको कामना गर्दै मौन धारणासमेत गरिएको थियो।
बढ्दो हिंसात्मक घटनाले समाजमा असुरक्षा बढाएको भन्दै प्रदर्शनकारीहरूले सरकार र सम्बन्धित निकायलाई मूकदर्शक नबन्न चेतावनी दिएका छन्।
