 (13)_1727965004.gif)
इटहरी : पर्यावरण जोगाउन भन्दै रोटरी क्लब अफ इटहरीले शनिवार चारकोशे झाडीको खाली ठाउँमा वृक्षारोपण कार्यक्रम सम्पन्न गरेको छ ।
हासपोसा सामुदायिक बन उपभोक्ता समूहले संरक्षण गर्दै आएको बन क्षेत्रको खाली भूभागमा ४ सय बढी फलफूलका बिरुवा रोपेको छ । बन उपभोक्ता समूह र प्रकृति संरक्षण अभियान लगायतका सस्थासंगको सहकार्यमा आँप, लिची अम्बा, अमला, बेल लगायत फलफूल रोपिएको बताइएको छ ।
क्लबकी अध्यक्ष शोभा कोइरालाका अनुसार जङ्गलको खाली भूभागमा फलफूलका बिरुवा रोप्दा वातावरण र जङ्गली जनावरको संरक्षण हुनेगरि उक्त क्षेत्रमा वृक्षारोपण गरिएको हो । जङ्गल मासिँदै जाँदा वातावरण पनि बिग्रँदै गएको, चराचुरुङ्गीहरू बसाइ सर्ने र बाँदरहरू खानेकुराको खोजीमा गाउँ सहर पस्ने गरेको बुझेर फलफूलका बिरुवा रोप्ने निर्णय गरिएको उनको भनाइ छ ।
पर्यावरणको लागी चराचुरुङ्गी तथा वन्यजन्तुको धेरै महत्त्व हुने प्रकृति संरक्षण अभियानका अभियन्ता ध्रुव घिमिरेले बताए । जङ्गल क्षेत्रमा फलफूल हुनु पर्यावरण सन्तुलनको मानक हुने उनको भनाइ छ ।
वृक्षारोपण कार्यक्रममा सहभागी भएका उद्योग वाणिज्य सङ्घ इटहरीका अध्यक्ष भीम पौडेलले बिरुवा जोगाउने काममा सक्दो सहयोग गर्ने बताए ।
रोटरी क्लब इटहरीले क्लब स्थापनाको २५ वर्ष प्रवेश गरेको अवसरमा वृक्षारोपण लगायतका कामहरू गरी रहेको छ । क्लबले यसअघि ताल तलैया क्षेत्रमा पनि वृक्षारोपण गरिसकेको छ ।
