 (13)_1727965004.gif)
इटहरी : इटहरी उपमहानगरपालिकाको पहिलो कार्यकालका जनप्रतिनिधिले जनता सँग चुनावका वेला गरेका वाचा पूरा गर्ने क्रममा दुई दिनमै छ वटा आधारभूत अस्पताल उद्घाटन गरेका छन् । चुनावका वेला सबै वडामा आधारभूत अस्पताल पुर्याउने प्रतिबद्धता गरिएको थियो ।
सरकारी स्वास्थ्य संस्था नभएका १४ वडामा आधारभूत स्वास्थ्य इकाई भवन निर्माण सम्पन्न भएका छन् । धमाधम उद्घाटन गरेर सेवा सुचारु गर्ने क्रममा उनले शनिवार वडा नम्बर १०, ११ र १३ मा इटहरी उपमहानगरपालिकाका प्रमुख द्वारीकलाल चौधरीले नवनिर्मित स्वास्थ्य इकाई भवनको उद्घाटन गरेका हुन । उनले अव आधारभूत सेवा लिन गाउँका ज्येष्ठ नागरिक, महिला, बालबालिका लगायतले सहर जानु पर्ने अवस्थाको अन्त्य भएको बताए ।
उनले विद्यार्थीलाई नियमित स्वास्थ्य परीक्षण गर्न समेत आग्रह गरे । उपप्रमुख लक्ष्मी गौतमले सङ्घीयता कार्यान्वयन गर्ने क्रममा इटहरी उपमहानगरपालिकाबाट भएका विकासका कार्यका कारण जनताले गाउँ गाउँमा सिंहदरबार आएको महसुस गरेको बताइन ।
वडा नम्बर १० मा वडाध्यक्ष प्रकाश चौधरी, ११मा वडाध्यक्ष रुपेश चौधरी र १३ मा वडाध्यक्ष शिव नारायण चौधरीको अध्यक्षतामा उद्घाटन कार्यक्रम गरिएको हो । कार्यक्रममा इन्जिनियर अरुण राजवलटले भवन निर्माण लागतको बारेमा र स्वास्थ्य संयोजक धनश्याम सिग्देलले स्वास्थ्य इकाई वाट प्राप्त हुने सेवाका बारेमा जानकारी दिएका थिए ।
बिहीबार मात्र वडा नम्बर १८, १९ र २० मा स्वास्थ्य इकाई भवन उद्घाटन गरिएको थियो । गाउँ गाउँका बासिन्दाले सवैका लागि स्वास्थ्य भन्ने नारा सुनेको तर सवैका लागि स्वास्थ्य आजै प्राप्त हुन लागेको भन्दै खुसी व्यक्त गरेका छन् ।
