विराटनगर: प्रदेश १ का स्वास्थ्य मन्त्री जयराम यादवले एक सय दिने प्राथमिकता सार्वजनिक गरेका छन् । मन्त्रालयमा आज आयोजित पत्रकार सम्मेलनमा मन्त्री यादवले एक सय दिने प्राथमिकताका २० बुँदा सार्वजनिक गरेका हुन ।
पत्रकार सम्मेलनमा मन्त्री यादवले सीमित स्रोत साधनले नागरिकका  चाहना र स्वास्थ्य प्रणालीका चुनौतीहरू एकैचोटी समाधान गर्न नसके पनि मन्त्रालयका गतिबिधिहरुलाइ थप व्यवस्थित र सुदृढ गर्दै लाने उद्देश्यले मन्त्रालयका नियमित काम बाहेक पहिलो १०० दिने कार्य योजना तयार गरी कार्यान्वयनमा ल्याइएको बताए । कार्य योजनाका कार्यहरू प्रदेश सरकारको नीति तथा कार्यक्रम र बजेटले निर्दिष्ट गरेका प्राथमिकता र तत्कालीन आवश्यकतालाई सम्बोधन गर्ने गरी तयार गरिएको उनले बताए 
मन्त्री यादवले प्रादेशिक स्वास्थ्य नीतिको खाका तयार गर्ने,  पशुबाट मानिसमा सर्ने रोगहरूको नियन्त्रणका लागि एक स्वास्थ्य रणनीति तयार गर्ने, स्वास्थ्य बिमा बोर्डको प्रदेश नं. १ को कार्यविधि तयार गरी मुख्यमन्त्री तथा मन्त्रिपरिषदमा पेस गर्ने, मेची अस्पताललाई २ सय शैयामा स्तर वृद्धि गर्न आवश्यक तयारी गरी स्वीकृतिका लागि मुख्यमन्त्री तथा मन्त्रिपरिषदमा पेस गर्ने,  विशेषज्ञ चिकित्सकको लागि सुविधा सम्बन्धीको निर्देशिका स्वीकृतिका लागि मुख्यमन्त्री तथा मन्त्रिपरिषदमा पेस गर्ने रहेको छ । 
त्यसैगरि स्वास्थ्य मन्त्रालयमा महाशाखा र शाखाहरूको कार्य विवरण तयार गर्ने, प्रादेशिक आयुर्वेद अस्पताल सञ्चालनमा ल्याउन आवश्यक व्यवस्था गर्ने,  प्रदेश जनस्वास्थ्य प्रयोगशालाको सेवा आफ्नै भवनबाट सुरु गर्ने, स्थानीय स्वास्थ्य संस्थाहरूको सुदृढीकरणको कार्यक्रम कार्यान्वयन गर्ने, मेची अस्पताल, मदन भण्डारी अस्पताल तथा ट्रमा सेन्टर उर्लाबारी, इनरुवा अस्पताल र गाईघाट अस्पताललाई आकस्मिक स्वास्थ्य सेवा तथा प्रेषण प्रणाली सुदृढ गर्न एम्बुलेन्स हस्तान्तरण गर्ने प्राथमिकता रहेको मन्त्री यादवले पत्रकार सम्मेलनमा बताए । 
उनले प्रदेश स्वास्थ्य आपूर्ति व्यवस्थापन केन्द्रको लागि जग्गा व्यवस्थापन गर्ने, कोभिड १९ को अवस्था, खोप लगायतका सम्पूर्ण जानकारी नियमित रूपमा सार्वजनिक गर्ने, प्रोल्याप्स युटरेस र फिस्टुलाको शल्यक्रिया प्रदेश भित्रका अस्पतालहरूसँग सम्झौता गरी कार्यक्रम सञ्चालन गर्ने व्यवस्था गर्ने, स्वास्थ्य मन्त्रालय अन्तर्गतका निकायहरूको कर्मचारी दरबन्दीको अवस्था अध्ययन गरी रिक्त पद परिपूर्ति गर्न सम्बन्धित निकायमा पहल गर्ने, प्रदेशभरिका स्वास्थ्यकर्मीहरूको रिक्तपदको विवरण संकलनगरि लोक सेवामा पठाइने, बजेटमा व्यवस्था भएका विभिन्न कार्यक्रम कार्यान्वयनका लागि आवश्यक मार्गदर्शन तयार गर्ने लगायत रहेको प्राथमिकता सार्वजनिक गरेका हुन ।