धरान : धरान उपमहानगरपालिकामा स्वतन्त्र उम्मेदवार हर्क साम्पाङले अग्रता बढाउँदै लगेका छन्। निर्वाचन अधिकृतको कार्यालय धरानले दिएको पछिल्लो अपडेट अनुसार लौरो चुनाव चिह्न भएका साम्पाङले गठबन्धनको तर्फबाट काँग्रेसका उम्मेदवार किशोर राईसँग १९१ मतको मतान्तरमा अग्रता कायम गरेका छन्। 
बुधवार दिउँसो सार्वजनिक भएको मत परिणाम अनुसार साम्पाङले १४ मतले काँग्रेसका राईलाई पछि परेका थिए। त्यसपछि बिहीबार बिहानसम्म वडा नम्बर २० को विवादका कारण रोकिएको थियो । बिहान ९ बजेदेखि सुचारु भएको मतगणनापछि स्वतन्त्र उम्मेदवार साम्पाङले मतान्तर बढाउँदै लगेका हुन् । 
पछिल्लो मत परिणाम अनुसार साम्पाङले ८६०६ मत ल्याउँदा काँग्रेसका राईले ८४१५ मत मात्रै ल्याएका छन् । यता २०७४ को स्थानीय तह निर्वाचनमा मेयर र उपमेयर जितेको एमाले भने तेस्रो स्थानमा पुगो छ। पछिल्लो मत परिणाम अनुसार एमालेकी मञ्जु भण्डारी सुवेदीले ६८९८ मत ल्याएकी छिन् । 
यता उपमेयरमा गठबन्धनको तर्फबाट माओवादी केन्द्रका आइन्द्र विक्रम बेघाले ९५२० मत ल्याएर अग्रता कायम गरिरहेका छन् । उनलाई एमालेका पदम इस्बो लिम्बुले ९१६२ मत ल्याएर पछ्याइरहेका छन् । बेघा २०७४ मा भएको स्थानीय तहको चुनावमा धरानको मेयर पदका उम्मेदवार थिए।