सुनसरी : सुनसरी निर्वाचन क्षेत्र नम्बर १ बाट नेकपा एमाले प्रदेश कमिटी सचिवालय सदस्य मनोज मेन्याङ्बो स्वतन्त्र उम्मेदवार बन्ने भएका छन् ।
नेकपा एमाले र जनता समाजवादी पार्टीले गठबन्धन गरेर सुनसरी क्षेत्र नम्बर १ मा जसपालाई दिएपछि एमाले नेता मेन्याङ्बोले स्वतन्त्र उम्मेदवारी दिन लागेका हुन् ।
मेन्याङ्बोले आज एक कार्यक्रम गरेर पार्टीले निर्णय नसच्याए आफ्नो उम्मेदवार कायम रहने बताएका छन् । एमालेको पकड एरिया रहेको क्षेत्रमा जसपाको उम्मेदवार उठाएर पार्टी नेतृत्वले नै कार्यकर्तालाई निराश बनाएको उनले बताए ।
उनले धरानमा पार्टीले हारेको इतिहास धेरै नभए पनि पछिल्लो समय नेतृत्वको कमजोरीले गत स्थानीय तहको निर्वाचनमा एमाले तेस्रो बन्न पुगेको टिप्पणी गरे । “धरानमा धेरै वडा जित्ने तर प्रमुख पद हार्ने किन भन्दा पार्टीको गलत निर्णय भएर हो ।” उनले भने ‘नेता तथा कार्यकर्ता नै भोट हालेनन् जसको असर मेयर, उपमेयरमा देखा पर्‍यो ।’ यदि यो निर्णय नसच्चिए नगर, प्रदेशव्यापी बनाउने समेत उद्घोष गरे । 
यस अघि उक्त क्षेत्रमा जिल्ला कमिटीले निवर्तमान प्रतिनिधि सांसद जयकुमार राईको नाम एकल सिफारिस गरेको थियो । तर गठबन्धनका नाममा पार्टी नेतृत्वले गलत गरेको भन्दै नेता तथा कार्यकर्ता नै रुष्ट भएका छन् । 
सुनसरीका सङ्घीय निर्वाचन क्षेत्र ४ वटा मध्ये सङ्घीय निर्वाचन क्षेत्र एक नम्बरमा जसपाले अशोक राईलाई उठाउने निर्णय गरेको छ । त्यस्तै जसपाले क्षेत्र नम्बर ४ को क मा प्रदेशसभा सदस्य पाउने भएको छ ।