धरान : सेवक अभियानले एघारौँ स्थापना दिवसमा धरानको सरसफाई अभियानको २५० औँ हप्ता पुरा गरेको छ ।
अभियानले प्रत्येक सोमबार धरानको विभिन्न स्थानमा सरसफाई गर्दै आएको छ । यसपालिको सोमबार आज २५०औँ हप्ता पुरा गरेको हो ।
उक्त अवसरमा प्रमुख अतिथि नगरप्रमुख हर्क साम्पाङ, विशेष अतिथि उपप्रमुख अइन्द्रबिक्रम बेघा र वडाध्यक्ष विद्या शाक्यले फोहोर टिप्दै धरान-३ गौधारादेखि पिण्डेश्वर मन्दिर सम्म सरसफाई गरेका थिए ।
नगरप्रमुख साम्पाङले धरानलाई स्वच्छ र सफा सहरकोरुपमा चिनाउन यस्तो अभियानले महत्त्वपूर्ण योगदान पुग्ने बताए । उनले सोमबार पिण्डेश्वरमा धेरै भक्तजनहरू आउँदा सरसफाई अभियानले सकारात्मक प्रभाव पर्ने बताए ।
कार्यक्रमका सभापति राजीव हलवाईले चेतनाको अभावले फोहोर यत्रतत्र फालेर कुरूप बनेको भन्दै यस्ता अभियानले जनतालाई जनचेतना बढाउँदै चेतना स्तर अभिवृद्धि जगाउने बताए ।
उनका अनुसार धरान सहित पाथीभरा, वराहक्षेत्र, राम धुनी मन्दिर, छिन्नाजस्ता मन्दिर, जानकी मन्दिर, सहलेस, गढीमाई, विराटनगर जोगवनी, भोजपुरमा पनि पुगेर सेवक अभियानले सरसफाई गरिसकेको छ ।
सरसफाई अभियानमा फुलबारी आमा समूह, त्रिवेणी महिला समूह, एभरेस्ट वातावरण समूहलगायत पनि सहभागी थिए ।
