धरान : बङ्गलादेशमा भएका आमनिर्वाचनमा बङ्गलादेश नेशनलिस्ट पार्टी बीएनपीले बहुमत हासिल गरेको अन्तर्राष्ट्रिय समाचार एजेन्सीहरूले जनाएको छ ।
वीएनपी दिवङ्गत पूर्व प्रधानमन्त्री बेगम खालिदा जियाने नेतृत्व गर्दै आएको पार्टी हो । बीएनपीले बहुमत हासिल गरे लगत्तै खालिदाका छोरा पार्टी अध्यक्ष तारिक रहमान प्रधानमन्त्री बन्ने सम्भावना बढेको छ । निर्वाचनमा बीएनपीले २९९ सिटमध्ये कुल १६५ सिटमा विजय हासिल गरेको छ ।
निकटतम प्रतिद्वन्द्वी जमात–ए–इस्लामीको नेतृत्वमा रहेको ११ दलीय गठबन्धनले अहिलेसम्म ४५ सिट मात्र जितेको समाचारमा जनाइएको छ । जमात प्रमुख सिफुकर रहमानले ढाका–१५ मा विजय हासिल गरेका छन् । अन्य दल र स्वतन्त्र उम्मेदवारहरूले ३ सिट जितेका छन् ।
पूर्व प्रधानमन्त्री खालिदाका छोरा बीएनपी अध्यक्ष तारिक रहमान दुई क्षेत्रमा चुनाव लडेकामा दुवै सिट जितेका छन् । उनी बेलायतमा १७ वर्ष निर्वासित जीवन बिताएपछि हालै मात्र बङ्गलादेश फर्किएका थिए ।
सन् २०२४ मा विद्यार्थी विद्रोह पछि तत्कालीन प्रधानमन्त्री शेख हसिना भारत पलायन र पूर्व प्रधानमन्त्री खालिदा जियाको निधनपछि बङ्गलादेशमा पहिलो पटक संसदीय चुनाव भएको हो ।
