इटहरी : कोशी प्रदेशको पर्यटन प्रवर्द्धन गर्न ३३ लाख लगानीमा इस्टर्न टुरिजम मार्ट आयोजना हुने भएको छ ।
नेपाल पर्यटन बोर्डको २८ लाख र इटहरी उपमहानगरपालिकाको ५ लाख सहयोगमा मार्ट आयोजना गर्न लागिएको हो ।
पर्यटन वर्ष मनाइरहेको कोशी प्रदेश सरकारले भने यस पटक सहयोग नगर्ने भएको छ । अघिल्लो वर्ष बोर्डले ३५ लाख, इटहरी उपमहानगरपालिकाले ५ लाख र प्रदेश सरकारले ५ लाख सहयोग गरेका थिए ।
भारतीय पर्यटकहरू र कोशी प्रदेशका पर्यटन व्यवसायीहरू बिच जमघट गराउने उद्देश्यले मार्ट आयोजना गर्न लागिएको हो । भारतको बिहार, सिक्किम र पश्चिम बङ्गाल तथा भुटानबाट समेत पर्यटनकर्मी र पत्रकारको उपस्थिति रहने जनाइएको छ । मार्टमा कोशी प्रदेशका ट्राभल व्यवसायी, होटेल तथा ग्रामीण पर्यटनकर्मी को स्टल राखिने भएको छ ।
कार्यक्रमको पहिलो दिन चैत १४ गते इटहरीको सोल्टी वेस्टेन्डमा उद्घाटन हुने र दोस्रो दिन भेडेटार लगायत स्थानको भ्रमण गरेर बिटुबी कार्यक्रम गर्ने तयारी छ । तेस्रो दिन उदयपुरको बेलका रिसोर्टमा केही औपचारिक कार्यक्रमका बिच मार्ट सम्पन्न हुने जनाइएको छ ।
