इटहरी : नेपाली काँग्रेस इटहरी उपमहानगर समितिका उपसभापति कोविदजङ्ग कार्कीले नागरिकसँग गरेको प्रतिवद्धताको हिसाब माग गरेका छन् ।
सामाजिक सञ्जाल फेसबुक मार्फत उपसभापति कार्कीले नयाँ बजेट प्रस्तुत गर्नु अगाडी निर्वाचनपछि हालसम्म इटहरीमा भएका कामको विवरण माग गरेका हुन् ।
उपमहानगर सभापति समेत रहेका इटहरीका मेयर हेमकर्ण पौडेललाई नयाँ सपना बाँड्नु अगाडी पुरानो प्रतिवद्धताको हिसाब दिन आग्रह गरे ।‘नगर प्रमुखज्यू, नयाँ बजेटको खाका प्रस्तुत गर्नु अगाडी निर्वाचनपछि आजसम्म इटहरीका लागि गर्नुभएको कामहरूको सूची, खर्च भएको बजेट,पूरा भएका योजना,कर्मचारी नियुक्तिको विवरण र जनताले महसुस गरेका उपलब्धिहरू सार्वजनिक गरिदिनुहोस्,’ उनले लेखेका छन् ।
कामको समीक्षा बिना बजेटको छलफल केवल भाषण मात्र बन्ने बताउँदै उनले तथ्यको आधारमा बहस गर्न अनुरोध गरे । जनताले अब आश्वासन होइन, उपलब्धिको प्रमाण खोजिरहेको उल्लेख गर्दै कार्कीले कामको आधारमा स्वमूल्याङ्कन गर्नुपर्ने आशय व्यक्त गरेका छन् ।
सभापति तथा मेयर पौडेलले इटहरीका २० वटै वडाका सभापतिहरूलाई आगामी आर्थिक वर्ष २०८३/०८४ को विषयमा छलफल गर्न बोलाएपछि कार्कीले प्रतिक्रिया दिएका हुन् ।
उनले भनेका छन्, ‘बजेटका लागि वडा सभापतिहरूसँग छलफल गर्नु राम्रो कुरा हो, तर नयाँ सपना बाँड्नुअघि पुराना प्रतिबद्धताको हिसाब पनि दिनुपर्छ । पहिला कामको विवरण, त्यसपछि नयाँ बजेटको बहस ।यही नै सुशासन र जबाफदेहिताको आधार हो ।’
