धरान : धरान उपमहानगरपालिकाको आज बिहीबार हुने भनिएको नगरसभा तथा त्यस बस्ने भनिएको कार्यपालिका बैठक स्थगित भएको छ ।
उपमहानगरपालिका सरसफाइ शाखाका सफाइ कर्मचारी मन्दिप राईको आकस्मिक निधन भएकोले बिहीबार घोषित शोक बिदाका कारण नगर कार्यपालिका बैठक र नगरसभा स्थगित भएको उपमहानगरपालिका कार्यालयले जनाएको छ । स्थगित कार्यपालिका बैठक र नगरसभा पुन भोली शुक्रवार हुने बताइएको छ ।
उपमहानगरपालिकाका अनुसार अत्यावश्यक सेवा बाहेक नगर कार्यपालिकाको कार्यालय,मातहतका सबै वडा कार्यालय तथा स्वास्थ्य संस्थामा बिहीबार शोक बिदामा बन्द रहने छन् ।
पूर्व निर्धारित कार्यक्रम अनुसार आज बिहान ९ बजेका लागि तोकिएको कार्यपालिका बैठक र नगरसभा दुवै शोक बिदाका कारण स्थगित गरिएको कार्यवाहक नगर प्रमुख बेघाले जानकारी दिए । उनले भने ‘शोक परेकाले आजका सबै औपचारिक कार्यक्रम स्थगित गरिएका हो ।’
उनका अनुसार स्थगित बैठक र नगरसभा शुक्रवार बिहान ९ बजे कार्यपालिका बैठक र दिउँसो १ बजे नगरसभा आयोजना गरिनेछ ।
धरान उपमहानगरपालिका नयाँ आर्थिक वर्षको पहिलो महिना सकिन लाग्दा पनि बजेट विहीन अवस्थामा छ ।
स्थानीय सरकार सञ्चालन ऐनअनुसार असार १० गतेभित्र बजेट नगर सभामा पेश गरी असार मसान्तभित्र पारित गरिसक्नुपर्ने व्यवस्था छ । तर धरानले हालसम्म बजेट ल्याउन सकेको छैन ।
