धरान : धरान उपमहानगरपालिकाको शुक्रवार बसेको बजेट तर्जुमा समितिको बैठकमा कार्यवाहक प्रमुख अइन्द्रविक्रम बेघालाई अश्लील शब्द प्रयोग गरेको भनी विवाद चर्किएपछि नगरसभा स्थगित भएको छ।
कावा प्रमुख बेघाका अनुसार बैठकका क्रममा धरान–१८ का वडाध्यक्ष नेपाली काँग्रेस संसदीय दलका नेता प्रवीण राईले टेबल ठोक्दै आफूलाई आमा चकारी गाली गरेको साथै धरान–१५ का वडाध्यक्ष नरेश इवरामले पनि ‘तेरो मात्र मनपरी चल्छ’ भन्दै टेबल ठोक्दै अभद्र व्यवहार गरेपछि बैठकको वातावरण तनावग्रस्त बन्यो । उनले भने " त्यसपछि सहमति जुट्न नसक्दा नगरसभा स्थगित गरियो ।"
बेघाले सहकारी पीडितका लागि उपमहानगरपालिकाले ५ करोड रुपैयाँ विनियोजन गर्नुपर्ने अडान राख्दै बजेटमा उक्त रकम समावेश गर्ने प्रयास गरेका बेला आफूलाई अश्लील शब्द प्रयोग गरी गाली गरिएको बताए ।
यसअघि कार्यपालिका बैठक र नगरसभा साउन २१ गते बिहीबारका लागि तय गरिएको थियो। तर सरसफाइ शाखाका कर्मचारी मन्दिप राईको निधनपछि उपमहानगरपालिकाले शोक बिदा दिएसँगै बैठक शुक्रबारका लागि सारिएको थियो। शुक्रवार पनि बजेटमा सहमति जुट्न नसकेपछि नगरसभा पुनः अन्योलमा परेको छ।
घटनाबारे संसदीय दलका नेता प्रवीण राई र वडाध्यक्ष नरेश इवरामलाई पटक पटक फोन सम्पर्क गर्दा फोन सम्पर्क हुन सकेन ।
