धरान : कार्यवाहक नगर प्रमुख अइन्द्रविक्रम बेघा व्यवहारिक नहुदा शुक्रवारको धरान नगरपालिकाको बजेट सम्बन्धी बैठकमा सहमति नजुटेको धरान–१८ का वडाध्यक्ष नेपाली काँग्रेसका संसदीय दलका नेता प्रवीण राईले बताएका छन् ।
नगर प्रमुख बेघालाई अपशब्द प्रयोग गरिदा विवाद भएर नगर सभा रोकिएको समाचारमा आपत्ति जनाउँदै वडाध्यक्ष राईले उक्त प्रतिक्रिया दिएका हुन ।
उनले कार्यवाहक प्रमुख बेघालाई अभिभावकीय भूमिका निर्वाह गर्न नसकेको, जिद्दीपन देखाएकोले बजेटमा सहमति नजुटेको बताए ।
उनले भने ‘कावा प्रमुखको केटाकेटीपनजस्तो व्यवहार भयो। जिद्दीपन धेरै भयो। उफ्रिने, कराउने बानीका कारण बजेट ब्रेक डाउन हुन सकेन ।’
आफूले कार्यवाहक प्रमुख बेघालाई पहिलो दिनदेखि नै सहयोग गर्दै आएको बताउँदै शुक्रवार पनि बजेटमा सहमति गराउन मात्र बैठकमा गएको बताए।
उनका अनुसार बजेट तर्जुमा तथा आर्थिक समितिमा विद्या शाक्य, विनीता बज्राचार्य लगायत सदस्यहरू छन्।
यसअघि कार्यवाहक प्रमुख बेघाले सहकारी पीडितका लागि ५ करोड रुपैयाँ बजेटमा समावेश गर्ने विषयमा आफूले अडान राखेपछि प्रवीण राई र नरेश इवरामले अश्लील शब्द प्रयोग गर्दै अभद्र व्यवहार गरेको आरोप लगाएको विवादले शुक्रवारका लागि तय गरिएको नगर सभा स्थगित भएको समाचार प्रकाशित भएको थियो ।
