धरान : यस पटक नेपाली फूलले राम्रो मूल्य पाएकोमा फूल किसान खुसी भएका छन् ।

धनकुटा नगरपालिका वडा नं. ३ मालबासेका फूल किसान सुक बहादुर राईले यस पटक धरानको कृषि उपज बजार स्थलमा ६, ७ हजार मुठा फूल बिक्रीका लागि ल्याएका थिए ।

Ful-3

उनले कृषि उपज बजार स्थलमा ४० देखि ६० रुपैयाँ मुठामा फूल बेचेको बताए । यस पटक पहाडी क्षेत्रमा राम्रो फूल फुल्यो र छिप्पियो पनि । भारतबाट फूल आयत नहुने हो भने यस पटक तिहारमा नेपाली फुल किसानले राम्रो मूल्यमा फुल बेच्न पाउने उनी बताउँछन् ।

कृषि उपज बजार स्थल धरान १३ बाट मात्रै आज ५० टन फूल बिक्री भएको कृषि उपज बजार स्थल धरानका व्यवस्थापक लक्ष्मण भट्टराईले बताए । यस पटक नेपाली फुलले बजारमा राम्रो मूल्य पाएको व्यवस्थापक भट्टराईले बताए ।

Ful-2

विगतका तिहारहरूमा धरानको भानुचौकमा भारतीय फूलले निकै राम्रो बजार पाएको भए पनि यस पटक आज बिहान भने नेपाली स्थानीय सयपत्री फूलले भानुचौकको घण्टाघर अघि ढाकेको थियो ।

किसानलाई फूलको भाउ बढेर राम्रै फाइदा पुगे पनि उपभोक्ता भने गतबर्षको तुलनामा अलि महँगोमा फुल खरिद गर्नुपरिरहेको सर्वसाधारणले बताए ।

बजारको भिडले कोरोना सङ्क्रमणको जोखिम : 
तिहारको बेलामा धरान बजारमा सर्वसाधारणको अत्यन्तै भिड बढेको छ ।

धरानको भानुचौक आसपासमा जहीतही खुलेका फुटपाथका पसलहरूमा सर्वसाधारणको घुइँचो बढेको छ । सामाजिक दुरी पनि कायम नगरी तिहारको सामाग्री किन्न सर्वसाधारण धुइरिएको देखिन्छ ।

Ful

धरानको भानुचौकमा रहेको घण्टाघर उत्तर तिरको फुटपाथ पसल सञ्चालन गर्न धरान २ वडा कार्यालयले नै अनुमति दिएकोले त्यहाँको फुटपाथका पसललाई व्यवस्थापन गर्न नसकिएको धरान उपमहानगरपालिकाका नगर प्रहरी प्रमुख विष्णु कोइरालाले बताए ।

यसरी बजारमा सर्वसाधारणको अत्यधिक घुइँचो बढ्नुले गर्दा तीव्र गतिमा फैलिरहेको कोरोना संक्रमणदर झन् बढ्न सक्ने देखिन्छ । यसबारेमा धरान उपमहानगरपालिकाले विशेष ध्यान दिन जरुरी देखिन्छ ।

Ful-1 Ful-4