धरान :रिक्त शिक्षक दरबन्दीमा शिक्षक नियुक्तिको माग राखेर विद्यार्थी आन्दोलन चर्किएपछि धरान उपमहानगरपालिकाका कार्यवाहक नगर प्रमुख अइन्द्र विक्रम बेघाले रिक्त शिक्षक तत्काल पूर्ति गर्ने अनशन बसेका बिरामी भएका विद्यार्थीको उपचार जिम्मा उपमहानगरपालिकाले लिने निर्णय गरेका छन् ।
धरान–११ को ज्ञानोदय मावि र धरान–६ को सरस्वती माविमा रिक्त शिक्षक दरबन्दीमा नियुक्तिको माग सहित विद्यार्थीहरू आन्दोलनमा उत्रिएका थिए। उपमहानगरपालिका घेराउ, तालाबन्दी र कार्यवाहक नगरप्रमुख बेघाको पुत्ला दहन समेत भएको थियो।
आन्दोलन चर्किएपछि उपमहानगरपालिकामा दवै विद्यालयका प्रधानाध्यापक, सरोकारवालासँग छलफल गरियो । छलफलले रिक्त रहेका शिक्षक दरबन्दीमा नियुक्ति प्रक्रिया अघि बढाउने विषयलाई प्राथमिकता दिने निष्कर्ष निकालेको छ।
बिदामा रहेका शिक्षकको सट्टामा अस्थायी वा वैकल्पिक शिक्षकको व्यवस्था गर्ने नगर कार्यपालिकाबाट आवश्यक निर्देशन दिइने भएको छ । लामो समयदेखि रिक्त रहेका शिक्षक पदका कारण विद्यार्थीको पठनपाठन प्रभावित भएको गुनासोपछि उपमहानगरपालिकाले तत्काल व्यवस्थापनको पहल गर्नेछ ।
छलफलमा विद्यालयहरूको लेखा परीक्षणको काम अघि बढाउने, विद्यालयको खाता सञ्चालन, शुल्क निर्धारणका विषयमा समिति गठन गरी कानुनी प्रक्रिया पूरा गरिने निष्कर्ष निकालिएको छ ।
आन्दोलनका क्रममा बिरामी भएका विद्यार्थी तथा उनीहरूका साथीहरूको स्वास्थ्य उपचारको जिम्मेवारी उपमहानगरपालिकाले लिने विषयमा बेघाले प्रतिबद्धता जनाए ।
संयुक्त बैठकले विद्यालयका समस्या समाधान गर्न उपमहानगरपालिका, विद्यालय प्रशासन, व्यवस्थापन समिति, विद्यार्थी तथा सरोकारवालासँग संवाद र समन्वय गर्ने निष्कर्ष निकालेको छ।
