धरान : मोरङको विराटनगर-१३ सैनिक टोलबाट प्रतिबन्धित औषधी सहित एक जना पक्राउ परेका छन् ।
पक्राउ पर्नेमा सोही स्थानका ३६ वर्षीय नरेश यादव रहेका छन् । यादवलाई हिजो साँझ साढे ६ बजे जिल्ला प्रहरी कार्यालय मोरङबाट खटिएको प्रहरी टोलीले पक्राउ गरेको हो ।
यादवले विभिन्न किसिमका प्रतिबन्धित औषधीहरू भन्सार छली गरी ल्याएर आफ्नो घरमा लुकाई छिपाई राखेको भन्ने विशेष सुराकका आधारमा खटिएको प्रहरी टोलीले उनको घरमा खानतलासी गरेको थियो ।
घरमा खानतलासी गर्ने क्रममा घरको पछाडि कम्पाउन्ड भित्र राखेको अवस्थामा प्रतिबन्धित औषधीहरू फेला पारी बरामद गरिएको जिल्ला प्रहरी कार्यालय मोरङले जनाएको छ ।
यसरी बरामद गरिएको प्रतिबन्धित औषधीहरू र पक्राउ परेका नरेश यादवलाई आवश्यक कारबाहीको लागी औषधी व्यवस्था विभाग विराटनगरमा बुझाउने जनाइएको छ ।
यसै गरी जिल्ला प्रहरी कार्यालय मोरङबाट गस्तीमा खटिएको प्रहरी टोलीले विराटनगर १३ बाट अवैध रूपमा भन्सार छली गरी ल्याएका लत्ता कपडाहरू बरामद गरेको छ ।
हिजो साँझ साढे ५ बजे विराटनगर-१३ हनुमान मन्दिर टोल एरियाबाट ६३ हजार ६ सय १० रुपैयाँ बराबरको विभिन्न किसिमका लत्ताकपडा, कस्मेटिक सामान तथा खाद्यान्न सामाग्रीहरू फेला पारी बरामद गरेको हो ।
बरामद गरिएको उक्त सामानहरू आवश्यक कारबाहीको लागी भन्सार कार्यालय रानी विराटनगरमा बुझाउने कार्य भइरहेको उक्त कार्यालयले जनाएको छ ।
