इनरुवा : भोटेकोशीको प्रलयकारी बाढीबाट पीडितको राहत तथा पुनर्स्थापना लागि सुनसरीका मुस्लिम समुदायले प्रधानमन्त्री उद्धार कोषमा ६२ लाख रुपैयाँ बढी सहयोग प्रदान गरेका छन् ।
नेपाली मुस्लिम समाज सुनसरीको पहलमा जिल्लामा सङ्कलन गरिएको कुल ६२ लाख ४५ हजार ४९ रुपैयाँ प्रधानमन्त्री दैवी प्रकोप उद्धार कोषमा जम्मा गरिएको हो ।
उक्त रकम सुनसरी जिल्लाको विभिन्न मुस्लिम बस्ती, मदरसा, मस्जिद, गैरसरकारी संस्था, निजी विद्यालय, व्यावसायिक सङ्घसंस्था र व्यक्तिगत तहबाट स्वैच्छिक रूपमा प्राप्त भएको समाजले जनाएको छ ।
नेपाली मुस्लिम समाज सुनसरीको प्रतिनिधिमण्डलले सङ्कलित रकमको बैङ्क भौचर सहित सहयोगदाताहरूको विवरण सुनसरीका प्रमुख जिल्ला अधिकारी ईश्वरीप्रसाद अर्याललाई हस्तान्तरण गरेको छ ।