धरान : विद्यार्थीको रुचि सामाजिक सेवामा बढाउन हिबिस्कस इङ्लिस बोर्डिङ स्कुल धरान १५ ले उनीहरूलाई पढाइसँगै सामाजिक क्रियाकलापमा जोड्दै आएको छ।
स्कुलको हिबिस्कस बाल क्लबले मङ्गलवार धरान–८ शनि मन्दिर र विश्वकर्मा मन्दिर परिसरमा सरसफाइ गरेको हो।
विश्वकर्मा पूजा नजिकिँदै गर्दा मन्दिर क्षेत्रमा भक्तजनको भीड बढ्ने भएकाले पूजा अगावै सरसफाइ गरिएको विद्यालयका निर्देशक गङ्गाराम कुलुङ राईले बताए। विश्वकर्मा पूजा असोज १ गते मनाइने गरिन्छ ।
क्लबले मासिक सरसफाइ अभियानमा यसअघि सडक तथा विभिन्न सार्वजनिक क्षेत्रमा समेत सरसफाइ गर्दै आएको उनले जानकारी दिए।
विद्यार्थीलाई किताबी ज्ञानमा मात्र सीमित नराखी सामाजिक कार्यमा संलग्न गराउँदा उनीहरूमा सेवा भाव बढ्ने निर्देशक राईको भनाई छ ।
विद्यार्थीको सामाजिकीकरण तथा नेतृत्व क्षमताको विकासको मुख्य उद्देश्यले अभियान सञ्चालन गरिएको राईले बताए।
क्लबले सरसफाइसँगै विद्यार्थीले आफ्नै खाजा खर्चबाट बचाएको रकम सङ्कलन गरी विभिन्न मानवीय सेवाका कार्यसमेत गर्दै आएको विद्यालयले जनाएको छ।
