धरान : धरान उपमहानगरपालिकामा कार्यरत कर्मचारीहरूले श्रम संस्कृति पार्टीको सदस्यता लिएको विवरण सार्वजनिक भएको छ ।
कर्मचारीको नाममा जारी भएको सदस्यता रसिदमा उनीहरूलाई पार्टीको ‘श्रमदाता साधारण सदस्य’ बनाइएको उल्लेख छ ।
सार्वजनिक भएको रसिद अनुसार उपमहानगरपालिकाको घण्टाघरका कर्मचारीहरू सुन्नीमा लिम्बु, सङ्गीता राई, अनुज भुजेल, स्पा केरुङ लिम्बु तथा खानेपानीका कर्मचारी माकुम राईको नाम सदस्यतामा रहेको देखिन्छ ।
रसिदमा सदस्यता वितरण गर्ने व्यक्तिमा सांसद हर्क साम्पाङको नाम रहेको छ । यस अघि कर्मचारीलाई पार्टीको सदस्यता नदिन भनेका साम्पाङले आफ्नै भनाई विपरीत सदस्यता दिएका हुन ।
साम्पाङले यसअघि कर्मचारी तथा पत्रकारलाई श्रम संस्कृति पार्टीको सदस्यता नदिने बताउँदै आएका थिए । उपमहानगरपालिकामा कार्यरत कर्मचारीको नाम पार्टी सदस्यताको रसिदमा देखिएपछि उनको भनाइ र गराईमा विरोधाभास देखिएको छ ।
सरकारी सेवामा कार्यरत कर्मचारी राजनीतिक दलको सदस्य बनेको भए त्यसको कानुनी तथा प्रशासनिक छानबिनको विषय बन्ने देखिन्छ । सम्बन्धित कर्मचारीहरूले सदस्यता स्वेच्छाले लिएको हो होइन ? सदस्यता बारे उनीहरूको आधिकारिक धारणा आएको छैन ।
