इटहरी : सुन्दरहरैँचा नगरपालिकाका सुकुम्वासीलाई आसन्न स्थानीय तहको निर्वाचन अगावै लालपुर्जा दिलाउने तयारी सुरु भएको छ । राष्ट्रिय भूमि आयोग सँग सहकार्य गरी नगरपालिकाले सो प्रक्रिया अगाडी बढाएको हो ।
लामो समय लालपुर्जा नपाएको भन्दै स्थानीय सुकुम्वासी बुधवार लालपुर्जाको माग राख्दै नगरपालिका घेराउ गर्न पुगेका थिए । लामो समय नाराबाजी भएपछि मेयर शिवप्रसाद ढकालले सुकुम्वासीलाई सम्बोधन गरेका थिए । सम्बोधनको क्रममा सुकुम्वासी समस्या समाधान गर्न लागिपरेको बताए ।
नेपाल भरिका ७५२ वटै स्थानीय निकाय भन्दा पहिला आफूले भूमि आयोग सँग सम्झौता गरेर जग्गा नाप जाँचको काम अगाडी बढाएको उनले जानकारी दिए । आजको भोलि पुर्जा दिन्छु भन्दा नमिल्ने भएकाले पहिला बनेका सुकुम्वासी समस्या समाधान आयोग जस्तो सुकुम्वासीलाई अल्झाएर अपराध नगर्ने उनले प्रष्टपारे ।
हालसम्मको ६०७२ घर धुरीको लगत सङ्कलन गरिएकाले छुटेका अझै सङ्कलन गर्ने काम भइरहेको उनको भनाई छ । सलकपुरमा कार्यालय खोलेरै वडा देखी नगरपालिका सम्म सर्वदलीय समिति गठन भएकाले कसैले विरोध नगर्ने गरी लालपुर्जा दिने कामको थालनी गरिएको मेयर ढकालले बताए ।
बसोबास गरेकालाई सोही स्थानमा वा बाँकीलाई अन्य वडामा भए पनि जग्गा उपलब्ध गराउने उनले प्रतिबद्धता जनाए । “छिमेकी पालिकामा कुनै प्रक्रिया नभएको अवस्थामा आफूहरूले भूमि आयोग, नापी कार्यालय र मालपोत कार्यालयको टोलीले सर्वेक्षण गरिरहेका छौँ । पहिला जग्गा नाप जाँच गरेर भूमिमा अधिकार छ भनेर निस्सा दिन्छौ र पछि भूमि आयोगले पुष्टि गरेपछि जग्गा उपलब्ध गराउँछौ । त्यसमा तपाईँहरू ढुक्क हुनुहोला । निर्वाचन अगाडी पुर्जा दिनेगरि हामी लागेका छौ,” उनले भने ।
