झापा : आज विश्व आत्महत्या रोकथाम दिवस । दिवसका अवसरमा आज हुने भनिएको आत्महत्या रोकथाम सम्बन्धीको कार्यक्रम स्थगित भएको छ । संयुक्त अधिराज्यकी महारानी एलिजावेथ द्वितीयको निधन भएको र दिवङ्गत आत्माको चिरशान्तिको कामना गर्दै आज देखी २७ गते सम्म शोक मनाउने नेपाल सरकारको निर्णय अनुसार आज हुने भनिएको आत्महत्या रोकथाम सम्बन्धीको कार्यक्रम स्थगित गरिएको बताइएको छ ।
आज प्रदेश १ को दमकसहित विभिन्न स्थानमा र देशैभरका विभिन्न स्थानमा कार्यक्रमको आयोजना गर्ने तयारी थियो । तर अन्तिम समयमा आएर कार्यक्रम स्थगित भएको जानकारी गराइएको छ । प्रहरीका अनुसार गत आर्थिक वर्ष २०७८/०७९ मा मुलुकभर ५ हजार ९ सय ८३ जनाले आत्महत्या गरेका छन् । आत्महत्या गर्नेको सङ्ख्या प्रदेश १ मा सबैभन्दा धेरै छ ।
एक वर्षमा १ हजार ४ सय ८९ जनाले प्रदेश १ मा आत्महत्या गरेको प्रहरीको तथ्याङ्कमा उल्लेख छ । प्रदेश १ पछि लुम्बिनीमा १ हजार २ सय ९७, मधेसमा १ हजार १५, बागमतीमा ९ सय १, गण्डकीमा ६ सय ९७, सुदूरपश्चिममा ५ सय ७९, उपत्यकामा ५ सय २६ र कर्णालीमा २ सय ९० जनाले आत्महत्या गरेको प्रहरीले जनाएको छ ।
