चतरा : सशस्त्र प्रहरी बलले हिजो सोमवार साँझ वराहक्षेत्र-५ विशाल चौक चतरा-धरान सडक खण्डमा धरानबाट चतरा आउँदै गरेको ट्याम्पोबाट १०४ केजी गाँजा बरामद गरेको छ ।
सशस्त्र प्रहरी बल नेपाल सुरक्षाबेस चतराका प्रहरी निरीक्षक शङ्कर कुमार कोइरालाका अनुसार साँझ साढे ६ बजेको समयमा को १ ह ६७४२ नम्बरको टेम्पोलाई चेकजाँच गर्न रोक्न खोज्दा अटो पल्टाएर चालक फरार भएको छ ।
चालक भागेपछि सशस्त्रको ७ जनाको टोलीले चेकजाँच गर्दा ट्याम्पोमा ४ वटा बोरामा गाँजा फेला पारेको हो । गाँजा तौल गर्दा १०४ केजी ७३ ग्राम रहेको सशस्त्रका निरीक्षक कोइरालाले बताए ।
बरामद गाँजा सहित ट्याम्पो आवश्यक कारबाहीको लागी इलाका प्रहरी कार्यालय महेन्द्रनगर चक्रघट्टीमा जिम्मा लगाइएको छ ।