धरान : धरान उपमहानगरपालिकाका पूर्व प्रमुख तिलक राईद्वारा शिक्षासेवी चन्द्रप्रसाद श्रेष्ठको नाममा स्थापित ‘चन्द्रप्रसाद श्रेष्ठ शिक्षा पुरस्कार कोष’द्वारा आज शुक्रवार धरानका ४ जना शिक्षासेवी पूर्व प्रधानाध्यापकहरूलाई नगद सहित सम्मानित गरिएको छ ।
सम्मानित हुनेहरूमा महेन्द्र झाँ, कमलप्रसाद पोखरेल, गोकुलप्रसाद श्रेष्ठ र चन्द्रकला प्रधान छन् । उमेरले ८० कटेका झाँ र पोखरेल सुनसरी जिल्लाका विभिन्न विद्यालयहरूमा प्रधानाध्यापक रही पब्लिक हाई स्कुल धरान-१२ का प्रधानाध्यापक रही अवकाश ग्रहण गरेको हुन ।
गोकुलप्रसाद श्रेष्ठ धरान स्थित शिक्षा निकेतन माविका प्रधानाध्यापक रही अवकाश ग्रहण गरेको हुन । श्रेष्ठ हाल प्राइभेट कलेज सञ्चालनमा क्रियाशील छन् ।
चन्द्रकला प्रधान किरातेश्वर मावि धरान-१९ की प्रधानाध्यापिका रही अवकाश ग्रहण गरेकी शिक्षासेवी हुन ।
कार्यक्रममा प्रमुख अतिथि काँग्रेस केन्द्रीय सदस्य, प्रचार विभाग प्रमुख मीन विश्वकर्माले उनीहरूलाई सम्मान पत्र सहित जनही १० हजार १०० रुपैयाँ प्रदान गरे ।
उक्त कोष तिलक राई नगर प्रमुख रहँदा उनको सुविधा वापत धरान उपमहानगरपालिकाबाट प्राप्त भत्ताको १ लाख ५० हजार रुपैयाँ अक्षयकोषमा प्रदान गरी २०७८ सालमा स्थापना गरिएको थियो ।
सोही कोषमा शिक्षा सेवी चन्द्रप्रसाद श्रेष्ठले १ लाख ५० हजार रुपैयाँ नै थप गरेर स्थापना भएको थियो । नेपाल शिक्षक संघले त्यसमा ५० हजार रुपैयाँ थपेर हाल कोषमा कुल ३ लाख ५० हजार रुपैयाँ रहेको जनाइएको छ ।
कोषले प्रत्येक वर्ष १ जना शिक्षासेवीलाई नगद पुरस्कार सहित सम्मानित गर्दै आएको छ । कोषका अध्यक्ष पूर्व मेयर तिलक राईका अनुसार हाल सम्म अवकाश ग्रहण गरेकाहरुलाई प्रदान गरिदै आएको सम्मान शिक्षामा सेवारत रही योगदान गर्दै आएकाहरुलाई पनि प्रदान गर्न सुझाव आएको कार्यक्रममा बताए ।
