धरान : कवि विमल गुरुङ स्मृति पुस्तकालयको ३३ औ राष्ट्रिय कविता महोत्सवमा अग्रज एवं युवा साहित्यका ४ जनालाई सम्मानित गरिने भएको छ ।

कवि विमल गुरुङको ५३ औ जन्म जयन्तीमा आयोजना हुँदै आएको प्रतियोगितात्मक कविता महोत्सवको पुरस्कृत कविताहरूको घोषणा कार्तिक १५ गते सार्वजनिक गरिने छ ।

पुस्तकालयद्वारा आज बिहीबार बिहान आयोजित पत्रकार सम्मेलनमा उक्त जानकारी दिइएको हो । उक्त अवसरमा सम्मानित हुनेहरूमा १०३ वर्षीय ज्येष्ठ नागरिक दिलमाया गुरुङ, विरेन गुरुङ, सिक्किमका साहित्यकार टिबी चन्द्र सुब्बा, युवा सम्मान पुरस्कार विवेक विवश रेग्मी छन् ।

कविता महोत्सवमा वाचन गरिने १० कविता मध्ये ३ कवि पुरस्कृत हुनेछन् । विजेताले नगद २० हजार, उपविजेताले १५ हजार, तेस्रोले १० हजार रुपैयाँ प्राप्त गर्ने छ ।

सोही अवसरमा कवि विमल गुरुङको कविता सङ्ग्रहको दोस्रो संस्करणको लोकार्पण गरिने छ । प्रमुख अतिथि नेपाल संस्कृत विश्वविद्यालयका निमित्त उपकुलपति प्राडा भीम खतिवडा रहने बताइएको छ ।