झापा : झापा शिवसताक्षी नगरपालिका वडा नम्बर १ कमल पुलस्थित पूर्व-पश्चिम राजमार्गमा आज (बुधवार) बिहान भएको सवारी दुर्घटनामा एक जनाको मृत्यु भएको छ ।

पश्चिमबाट पूर्वतर्फ आउँदै गरेको प्रदेश १-०१-००१ च ८२२१ नम्बरको बोलेरो पिकअप र विपरीत दिशाबाट जाँदै गरेको मे ६ प २५१४ नम्बरको मोटरसाइकल एक आपसमा ठोक्किएर दुर्घटना भएको थियो ।

दुर्घटनामा मोटरसाइकल चालक शिवसताक्षी-८ का अन्दाजी ३५-४० वर्षीय ललितबहादुर थापा घाइते भएका थिए । घाइते थापालाई उपचारको लागि बीएण्डसी अस्पताल बिर्तामोड लगेर उपचार भइरहेको थियो । उपचारकै क्रममा बिहान ६ः५५ बजे मृत्यु भएको चिकित्सकले घोषणा गरेको प्रहरीले जनाएको छ ।

पिकअप र पिकअप चालक मेचीनगर नगरपालिका-८ का ३१ वर्षीय विशाल खवासलाई नियन्त्रणमा लिएर इलाका प्रहरी कार्यालय झिलझिलेमा राखी थप अनुसन्धान कार्य भइरहेको जिल्ला प्रहरी कार्यालय झापाले जनाएको छ ।