धरान : इलाका प्रहरी कार्यालय धरानले धरान-१९ तलतिर चारकोसे जङ्गलमा भरुवा बन्दुक सहित कारमा जाँदै गरेको ५ जनालाई १ थान भरुवा बन्दुक र त्यसमा लाग्ने बारुद सहित पक्राउ गरेको छ ।
पक्राउ गरिएकाहरूमा इटहरी-१३ का ३५ वर्षीय कार चालक ज्योतिस चौधरी, रामधुनी-७ का ३३ वर्षीय सन्जु राई, ३१ वर्षीय विनय राजधामी, २८ वर्षीय दिवस माझी, मोरङ सुन्दरहरैचा-२ का ४१ वर्षीय मेहरमान भुजेल छन् ।
उनीहरूलाई शनिवार राती साढे १० बजेको समयमा बा ४ च ४३३ नम्बरको कारमा जङ्गलको बाटो धरानबाट रासताल तर्फ गइरहेको बेला पक्राउ गरिएको इलाका प्रहरी कार्यालय धरानले जानकारी दिएको छ ।
प्रहरी टोलीले शङ्का लागि चेकजाँच गर्दा कार पछाडिको सिटको मुनि भरुवा बन्दुक १ थान लुकाएर राखेको अवस्थामा बरामद गरिएको हो ।
बन्दुक सँगै टोटा बन्दुकको गोली २ थान, बारुद भरिएको सानो बट्टा २ थान, प्लास्टिकमा पोका बनाएको सानो १ पोका बारुद, सानो सेतो बट्टामा बारुदको बट्टा १ थान, भरुवा बन्दुकमा लाग्ने फलामको गोली ३ थान र खुकुरी १ थान बरामद गरिएको छ ।
पक्राउ परेकाहरूलाई नियन्त्रणमा लिई इलाका प्रहरी कार्यालय धरानमा ल्याएर थप अनुसन्धान कार्य भइरहेको प्रहरीले जनाएको छ ।
Banduk-&-car-2