इटहरी : इटहरीमा वैशाखबाट ‘मङ्गल राधिका सदानन्द प्रणामी अस्पताल’ सञ्चालनमा आउने भएको छ ।
इटहरीमा व्यवस्थित अस्पतालको अभाव भएको आवाज उठिरहेको बेला प्रणामी मन्दिर मुक्तिधामको अस्पताल सञ्चालनमा आउन लागेको हो ।
श्रीकृष्ण प्रणामी मन्दिर मुक्तिधाम इटहरीका अनुसार २०८२ सालको वैशाख १ गते स्वामी १०८ सदानन्द महाराजबाट उद्घाटन हुने बताइएको छ । श्रीकृष्ण प्रणामी मन्दिर मुक्ति धाम इटहरीको ४६ औँ वार्षिक उत्सवको अवसर पारेर उद्घाटन गरिने मङ्गलवार पत्रकार सम्मेलनको मार्फत जानकारी गराइएको हो ।
श्री १०८ पाठपरायण अन्तर्राष्ट्रिय महोत्सव समेत आयोजना गर्न लागिएको आयोजक मूल समारोह समितिका अध्यक्ष हेमप्रसाद घिमिरेले बताए । उनका अनुसार स्वामी श्री १०८ डा. सदानन्द महाराजजीको सहयोगबाट निर्माण गरिएको १५ शय्याको अस्पतालबाट २४ घण्टा स्वास्थ्य सेवा उपलब्ध हुने भएको छ ।
अस्पताल निर्माण तथा व्यवस्थापन समितिका अध्यक्ष समेत रहेका घिमिरेले अस्पतालमा एमडी एक जना र २ जना एमबिबिएस डाक्टरले सेवा दिने जानकारी दिए ।
धरानको बिपी कोइराला स्वास्थ्य विज्ञान प्रतिष्ठानकै शुल्कमा आधुनिक ल्याब तथा फार्मेसी सहितको सेवा प्रदान गर्न लागेको उनले बताए ।