_1735354691.gif)
धरान : विद्युत् सर्ट भएर घरमा आगलागी हुँदा मङ्गलवार मोरङ धनपालथान-७ का एक ४ वर्षिया बालिकाको मृत्यु भएको छ ।
कोशी प्रदेश प्रहरी कार्यालयले जनाए अनुसार आगलागी अमित मियाँको घरमा भएको हो । आगलागी हुँदा घर भित्र रहेकी उनको ४ वर्षीय छोरी रेस्मा खातुनको जलेर मृत्यु भएको छ ।
दिउँसो साढे १२ बजे विद्युत् सर्ट भई घरमा आगलागी भएको जानकारी पाएपछि तत्काल उद्धारका लागी मोरङका प्रमुख जिल्ला अधिकारी इन्द्र देव यादव, जिल्ला प्रहरीका एसपी नारायणप्रसाद चिमरिया प्रहरी टोली घटनास्थल पुगेका थिए ।
प्रहरी सहित स्थानीयवासी र ५ वटा दमकलको सहयोगमा पौने २ बजे आगो नियन्त्रण गरिएको थियो । आगलागीबाट नजिकका १३ घर परिवारको फुसको १६ वटा घर, भान्सा घर ३ र गोठ २ वटा जली नष्ट भएको छ ।
यसैगरी मङ्गलवारै दिउँसो पौने ३ बजे उदयपुर चौदण्डीगढी-७ का शरण कुमार राईको घरमा बिद्युत् सट भई आगलागी हुँदा नजिकको सर्वधन राई र कालुमान राईको घर समेतमा आगलागी भएको छ ।
आगलागीमा पूर्ण रूपमा जलेर नष्ट भएको, सोही घर नजिकको अर्को ४ वटा घर आंशिक क्षति हुँदा करिब १ करोड २२ लाख बराबरको क्षति भएको छ ।
इलाका प्रहरी कार्यालय बेल्टारको प्रहरी टोली, स्थानीयवासी र ३ वटा दमकलको सहयोगमा साँझ ५ बजे आगो पूर्ण रूपमा नियन्त्रणमा लिएको थियो ।
प्रदेश प्रहरी कार्यालयका अनुसार अधिकांंस आगलागीका घटनाहरू मानवीय त्रुटिका कारणबाट हुने गर्दछन् । त्यसको रोकथाम तथा न्यूनीकरण गर्न सबै सचेत हुन जरुरी रहेको देखिएको छ ।
बालबालिकाहरूलाई जथाभाबी सलाई, लाईटर खेलाउन नदिने, खाना पकाई सकेपछि आगो राम्ररी निभाउने, ग्याँस सिलिण्डरको प्रयोगमा सावधानी अपनाउने, चुरोट विँढीको ठुटो जथाभाबी नफाल्ने सचेतना बढाउन प्रदेश प्रहरी कार्यालयले आग्रह गरेको छ ।
_1664681437.jpg)
