वराहक्षेत्र : वराहक्षेत्र नगरपालिकाले शुक्रवार कालाबञ्जर बजारमा अनुगमन गरेको छ । नगरपालिकाको नियमित बजार अनुगम कार्यक्रम अन्तर्गत उपभोक्ताहरूको अधिकार सुनिश्चितताको लागि नगरपालिकाको अनुगमन टोलीले कालाबञ्जर बजारका पसलहरू अनुगमन गरेको हो ।

नगरपालिकाका आर्थिक विकास शाखाका प्रमुख मातृका तिवारीका अनुसार अनुगमनको क्रममा बजारमा रहेको पसलहरूबाट म्याद नाघेका खाद्य सामाग्री, चिसो पदार्थहरू, मसला जन्य सामाग्रीहरू, घिउ, बिस्कुट, गैर खाद्यान्नका सामाग्रीहरू रङ्ग लगायतका सामाग्रीहरू फेला पारेर नष्ट गरिएको थियो ।

म्याद नाघेको सामाग्री फेला परेको पसल, दर्ता प्रक्रिया नगरी सञ्चालन भएका पसल र होटेलहरूलाई जरिमाना समेत गरिएको आर्थिक विकास शाखाका प्रमुख तिवारीले बताए ।

उनका अनुसार उपभोक्ताको हित विपरीत सञ्चालन भएका उद्योग, पसलहरूलाई नियमको पालना, म्याद नाघेका सामाग्री राख्ने व्यापारीहरूलाई जरिवाना, ४० माइक्रोन भन्दा कम प्लास्टिकका झोलाको अनुगमन गरिएको छ ।

आर्थिक विकास शाखाका प्रमुख मातृका तिवारीको नेतृत्वको टोलीमा शुक्रवार भएको अनुगमनमा खाद्य प्रविधि तथा गुण नियन्त्रण डिभिजन कार्यालय, सुनसरीका खाद्य निरीक्षक उज्लब कोइराला, उद्योग वाणिज्य सङ्घ वराहक्षेत्रका प्रतिनिधि, नेपाल प्रहरी, नगर प्रहरी, पत्रकार लगायतको सहभागिता रहेको थियो ।