बैंक मार्फत पैसा आउने भएपछि नगर प्रमुख हर्क साम्पाङ हङकङ नगएको आशंका धरान युके मञ्चले हुण्डी र व्यक्तिगत खातामा पठाएको थियो रकम

धरान : धरान उपमहानगरपालिकाका प्रमुख हर्क साम्पाङले हङकङ नजानुको मुख्य कारण ‘रोजगार भिषा’ देखाएतापनि खास कारण अर्के भएको आशंका गरिएको छ ।

उनको हङकङ जानुको मुख्य उदेश्य ‘सुम्निमा पारुहाङको प्रतिमा’ निर्माणको लागि ‘फण्ड राइजिङ’ अर्थात आर्थिक संकलन थियो । यसअघि उनी युके जाँदा संकलन भएका कतिपय रकम धरान युके मञ्चले हुण्डी वा व्यत्तिगत खाता मार्फत रकम पठाएको  थियो ।

यसपाली हङकङमा संकलन हुने रकम भने किरात राई यायोक्खा हङकङले बैंकिङ कारोबारबाट मात्र पठाउने भएको थियो । त्यही कारण नगर प्रमुख साम्पाङ हङकङ नगएको आशंंका गरिएको हो ।

किरात राई यायोक्खा हङकङले अप्रिल २१ तारिख बैशाख ८ गते पत्रकार सम्मेलन गरी कार्यक्रमको जानकारी सहित संकलित रकम धरानमा ‘सुम्निमा पारुहाङ  प्रतिमा निर्माण’ सम्बन्धि बैंक खाता खोलेपछि मात्र बैंकमा पठाउने जनाएको थियो ।

हङकङमा पत्रकार सम्मेलन गरी बैंकिङ कारोबार मार्फत मात्र पैसा पठाउने जानकारी गराएको छैठौं दिन नगर प्रमुख साम्पाङले अप्रिल २७ तारिख वैशाख १४ गते 'गलत भिजा लगाइदेको कारण हङकङको यसपालिको मेरो यात्रा स्थगित होला जस्तो छ जय मान्छे', भन्दै फेसबुकमा स्टाटस लेखेका थिए ।

किरात यायोक्खा हङकङको अप्रिल २१ मा भएको पत्रकार सम्मेलनमा सुम्नीमा पारुहाङ प्रतिमा निर्माण सहयोग संकलन अभियान 'मिट एण्ड ग्रिट हर्क साम्पाङ' को पत्रकार भेटघाट कार्यक्रमका मुल संयोजक शशीमदन राईले मे ५ देखी ८ सम्म हङकङको विभिन्न ठाउँमा नगर प्रमुख साम्पाङको कार्यक्रम रहेको जानकारी दिएका थिए ।

संयोजक राईले प्रमुख साम्पाङसँग भेटभाटको कार्यक्रममा हङकङमा रहेका नेपालीले बोल कबोल गरेको रकम ६ महिना अर्थात २०२५ अक्टुबर ३१ सम्म  किरात राई यायोक्खा हङकङको बैंक खातामा संकलन हुने बताएका थिए ।

उक्त रकम धरानमा सुम्निमा पारुहाङ प्रतिमा निर्माण समितिले बैंक खाता खोलेपछि आधिकारीकता प्रमाणित भएपछि यायोक्खाको खातामा रहेको रकम धरानको बैंक खातामा पठाउने बताएका थिए ।

संयोजक राईले बैंकिङ कारोबार वाहेक उठेको रकम हुन्डी मार्फत र व्यत्तिगत खातामा रकम नपठाउने बताएका थिए ।

किराया हङकङले नगर प्रमुख साम्पाङले सुम्निमा पारुहाङलाई आर्थिक सहयोग जुटाउनका लागि पठाएको पत्रलाई स्विकार गर्दै पत्रको आधारमा समिती गठन गरेको पत्रकार सम्मेलनमा बताइएको थियो ।

गठित समितिले प्रमुख साम्पाङसंग पत्रचार गरेको र कार्यक्रम आयोजना गर्ने मिती समेत तय गरी पटक पटक साम्पाङसँग फोन र व्हाटस्एपमा सम्पर्क गर्दा आयोजक संस्था र किराया हङकङसँग साम्पाङ सम्पर्कमा नआएको पत्रकारहरुलाई जनकारी गराइएको थियो ।

पत्रकार सम्मेलनमा संयोजक राईले ‘कम्युनिकेशन नभएकोले मिसअन्डरस्टाण्डिङ भएको’ तर नगरप्रमुख साम्पाङ हङकङ आउने कन्र्फम भएको बताएका थिए ।

किराया हङकङका एक प्रतिनिधीले भने ‘नगरप्रमुख साम्पाङ हङकङ नजानुको मुख्य कारण हुन्डी मार्फत र व्यक्तिगत खातामा रकम नपठाई बैंक मार्फत रकम पठाउने भएकाले नै हो ।’

यसअघि धरान युके मञ्चले भने हुण्डी वा व्यत्तिगत खातामा रकम जम्मा गरेको थियो । हङकङले पनि त्यसरी नै कारोबार गर्छ होला भन्ने सोच बनाएकोमा त्यसो नभएकाले साम्पाङ हङकङ नआएका हुनसक्ने उनले बताए ।

प्रमुख साम्पाङलाई हङकङमा रहेका नेपालीहरूको एसअफ स्पेडस इन्टरटेनमेन्टले मे ३ र ४ तारिख गर्ने ‘नेपाल फेस्ट २०२५’ सांस्कृतिक तथा साङ्गीतिक कार्यक्रममा रकम संकलन गर्न बोलाएको थियो ।

सामाजिक संस्था हिन्सले फेसबुक मार्फत उनको यात्रा निश्चित भएको जनाउँदै नगरप्रमुख साम्पाङको ४ जनाको टोली सहित ८० जना कलाकारहरूको टोलीलाई एकमुस्ट ‘रोजगार भिषा’ लागेको जानकारी दिएको थियो ।

तर नगरप्रमुख साम्पाङ कामदार भीषाको कारण देखाउँदै हङकङ गएनन् । हिन्सले हङकङमा हुने सबै खालका कार्यक्रमको लागि कानुनी रूपमा इम्प्लोइमेन्ट भिषा लिनुपर्ने स्पष्ट गरेको छ । अन्य भिषा लगाए हङकङको अध्यागमन विभागले गैर कानुनी ठहर गर्ने बताएको छ ।

प्रमुख साम्पाङ कार्यक्रमबाट सङ्कलित रकम लिएर नेपाल फर्कने भएकाले पनि ईम्पोलोर्ईमेन्ट भिषा लगाइएको थियो तर सोही भिषालाई अपमान भएको बताउँदै साम्पाङ हङकङ नगएका हुन । साम्पाङ आफुलाई 'श्रम पिता' भन्न रुचाउछन् ।