सुनसरी : इटहरी उपमहानगरपालिकाका मेयर हेमकर्ण पौडेलले जनताको निराशाकै नाममा तानाशाही शासन आउने गरेको उदाहरण दिदैं नेपाली समाजले इतिहासबाट पाठ नसिके लोकतन्त्र गम्भीर सङ्कटमा पर्नसक्ने चेतावनी दिएका छन् ।
फागुन २१ गतेको चुनावको परिवेशमा सामाजिक सञ्जाल फेसबुक मार्फत धारणा सार्वजनिक गर्दै मेयर पौडेलले हिट्लरको उदय र त्यसले निम्त्याएको तानाशाही शासनलाई उदाहरणका रूपमा प्रस्तुत गरेका हुन ।
त्यसो त नेपालमा पनि २०१७ सालमा दलीय लोकतन्त्र अफाप भएको जनताले नचाहेको भन्दै लोकतन्त्र समाप्त गरिएको थियो । पोडेलले लेखेका छन् ‘इतिहास किताबमा मात्र होइन, हाम्रो आँखै अगाडि पनि दोहोरिन्छ ।’
जनताको निराशा र सङ्कटबाटै उदाएको थियो-मिठा भाषण, अरूलाई दोष र ‘समाधान म मात्र हुँ’ भन्ने भ्रमसहित हिट्लर उदाएको उनले उल्लेख गरेका छन् । ताली र भीडको समर्थनकै कारण अन्ततः लोकतन्त्र समाप्त गरिएको र लाखौँ निर्दोष नागरिकको हत्या भएको स्मरण उनले स्मरण गराएका छन् ।
इतिहासप्रति गम्भीर हुन आग्रह गर्दै मेयर पौडेलले वर्तमान राजनीतिक सन्दर्भमा नयाँ दलहरू पनि पुरानै शैलीको ‘सजिएको संस्करण’ जस्तो देखिएको उल्लेख गरेका छन् ।
'नारा नयाँ छन्, अनुहार ताजा छन्, तर झुटको खेती उही पुरानो शैलीमा भइरहेको छ ।' उनका अनुसार वाचा धेरै भए पनि जिम्मेवारी सधैँ भोलिकालागि सारिने प्रवृत्ति लोकतन्त्रका लागि खतरनाक सङ्केत हो ।
जब झुटलाई ‘परिवर्तन’को नाम दिइन्छ, त्यही दिन सत्यलाई सबैभन्दा बढी चोट पुग्ने कुरा स्मरण गराउँदै मेयर पौडेलको नागरिकलाई प्रश्न गरेका छन् ‘हामी सचेत नागरिक हौँ कि भीड तन्त्र र लोकतन्त्रको दोबाटोमा उभिएका दर्शक ?’
