धरान : उज्यालो नेपाल पार्टीका संयोजक कुलमान घिसिङले आफ्नो पार्टीको सरकार बनेपछि १८ वर्ष देखिको लोडसेडिङ एक महिनामै अन्त्य गरे जस्तै देशको दुर्गन्धित राजनीति पनि अन्त्य गर्ने कुरा बताएका छन् ।
भानुचौकमा आज सोमवार आयोजित उज्यालो नेपाल र राष्ट्रिय परिवर्तन पार्टीको संयुक्त चुनावी सभामा उनले भने ‘जसरी लोडसेडिङ अन्त्य गरियो, त्यसै गरी देशको दुर्गन्धित राजनीति पनि अन्त्य गर्छु साथ दिनुस् ।’
उनले देशको राजनीतिमा पारदर्शी र इमानदार नेतृत्व स्थापित गर्न बिचौलिया तन्त्रको अन्त्य अनिवार्य रहेको बताए ।
उनले जेन्जी आन्दोलनको जगमा बनेको उज्यालो पार्टीले मात्र देशलाई सही दिशामा लैजान सक्ने दाबी गर्दै अँध्यारो र भ्रष्ट व्यवस्थाको अन्त्य गर्ने अभियानको जिम्मेवारी उज्याले पार्टीले लिएको उनले बताए ।
घिसिङले भने ‘उज्यालो पार्टी बोल्ने होइन, गर्ने पार्टी भएकोले लघुवित्त, मिटरब्याजी, भूमिहीन र सुकुम्वासी समस्या अन्त्य हाम्रो लक्ष्य हो ।’
सरकारमा पुगेको एक वर्षभित्र सुकुम्वासी समस्या अन्त्य गर्दे स्वास्थ्य र शिक्षा निःशुल्क गरी एक घर–एक धारा अवधारणा लागु गर्ने उनले बताए । नेपाललाई ऊर्जामा आत्मनिर्भर बनाएर विद्युत् निर्यात गर्ने योजना सुनाउँदै उनले भविष्यमा इन्धनको रूपमा हाइड्रोजन उत्पादनको सम्भावना रहेको बताए ।
उनले भने ‘नेपालको स्वच्छ पानीलाई बोतलमा भरेर अन्तर्राष्ट्रिय बजारमा निर्यात गरी आर्थिक क्रान्ति गर्ने सोच रहेको छ ।’
जल विद्युत् उत्पादन मार्फत गरिबी निवारण र स्वरोजगार सिर्जना गर्न उज्यालो नेपालको सरकार बनाउन सहयोग गर्ने उनले आव्हान गरे ।
भाषण होइन, परिणाम दिन्छु : उम्मेदवार लावती
उम्मेदवार जेन्टल लावतीले भने ‘उज्यालो पार्टी परिणाम दिने पार्टी भएकोले मैले जिते भने भाषण होइन, परिणाम दिन्छु ।’
धरानका पूर्व नगर प्रमुख हर्क साम्पाङ प्रति सङ्केत गर्दै लावतीले गाली गलौज र धाक धम्कीको राजनीतिले देशमा अराजकता बढाउन खोजेको आरोप लगाए ।
एक इमानदार र पहिचानवादी सोच भएको नेता भएकोले आफ्नो काम पनि इमान्दार हुने उनको भनाई छ ।
लावतीले भने ‘धरानको दीर्घकालीन खानेपानी समस्या समाधान गर्दे सुनसरी क्षेत्र १ लाई धार्मिक तथा सांस्कृतिक पर्यटन प्रवर्द्धन गर्ने र लागु औषध दुर्व्यसन अन्त्य गर्न भूमिका खेल्नु पहिलो प्राथमिकतामा रहने छ ।’
जेनजी मुभमेन्टकी शुभेच्छा राईले युवाको ऊर्जा परिवर्तनको संवाहक शक्ति भएको बताइन । उनले भनिन,“एउटै बोतलको पानीमा विष छ कि औषधि, छुट्याएर हेर्नुपर्छ, एक पटक सोच्नुस् र भोट चिममा लगाउनुस् ।’
