_1749430366.gif)
धरान : धरान उपमहानगरपालिका तत्कालीन प्रमुख हर्क साम्पाङले धरान वडा १३ साबिक वाँझंगरा ९ क र घोपा ७ घ र ङ का जग्गामा अदालतको आदेश नआएसम्म कुनै कर नलिन लिखित आदेश गरेकाले हाल सम्म उक्त क्षेत्रका सबै जग्गा सम्बन्धी समस्या सुल्झिएको छैन ।
पछिल्लो समय सामाजिक सञ्जालमा धरान १३ को जग्गाको कर रोक्का तत्कालीन प्रमुख हर्क साम्पाङले नगरेको भनी प्रचार भएको अवस्थामा धरान १३ वडा कार्यालयले प्रमुख साम्पाङको हस्ताक्षर सहित धरान १३ वडा कार्यालयलाई दिएको लिखित आदेश सार्वजनिक गरेको हो ।
प्रमुख साम्पाङले २०८२ वैशाख १३ गते वडा कार्यालयलाई पठाएको पत्रमा ‘उक्त जग्गाहरू सर्दु खर्दु जलाधार भित्र पर्ने मानिने भएकाले कुनै कर सङ्कलन नगर्नुहोस् । कसैले कर सङ्कलन गरेमा सम्बन्धित व्यक्ति स्वयं कानुनी दण्ड र जबाफदेही हुनेछन्’ भन्ने कडा आदेश छ ।
आदेश भएसँगै त्यस बेला धरान १३ वडाबापत चिन्तित हुँदै आन्दोलन समेत गरेका थिए । वडा १३ का बासिन्दाहरूले आफूहरूले कर तिर्नु पाउनु पर्ने पटक पटक माग समेत राखेका थिए ।
सर्दु–खर्दु जलाधारसँग जोडिएको यो विवादले धरान १३ का बासिन्दाहरूलाई बैङ्किङ सेवा, कर्जा, घरजग्गा कारोबार र अन्य प्रशासनिक सेवाबाट वञ्चित बनाएको वडाध्यक्ष नेत्र काफ्ले बताउँछन् ।
उनका अनुसार यसअघि २०६० असोज १४ मा सर्वोच्च अदालतले विवादित जग्गामा यथास्थिति कायम राख्न अन्तरिम आदेश जारी गरेको थियो । प्रमुख साम्पाङले भने ‘अदालतको फैसला नआएसम्म कुनै पनि निर्णय कार्यान्वयन नगर्ने’ आदेश दिएका हुन ।
