धरान : पब्लिक फुस्रे स्कुल धरान–१३ का विद्यार्थीहरूलाई शुक्रवार आसरा सुधार केन्द्रले लागूपदार्थ विरुद्ध सचेतना प्रशिक्षण दिएको छ ।
अन्तर्राष्ट्रिय लागूपदार्थ दुर्व्यसनी तथा अवैध तस्करीविरुद्ध दिवस मनाउँदै केन्द्रले स्कुलका कक्षा १ देखि ५ सम्मका ६७ जना विद्यार्थीलाई स्कुल ब्याग तथा स्टेशनरी सामग्री पनि वितरण गरेको हो ।
उनीहरूलाई ‘लागूपदार्थलाई होइन, उज्ज्वल भविष्यलाई रोजौँ’ नारा सहित सुधार केन्द्रका प्रशिक्षकहरूले लागूपदार्थ दुर्व्यसनका असर, त्यसबाट बच्ने उपाय तथा स्वस्थ जीवनशैली अपनाउने विषयमा प्रशिक्षण प्रदान गरेका हुन ।
प्रमुख अतिथि नेपाल प्रहरी श्रीमती सङ्घकी अध्यक्ष श्रीमती नबिना खत्री कार्कीले लागूपदार्थ दुर्व्यसनबाट टाढा रहँदै अनुशासित र सकारात्मक जीवनशैली अपनाउन विद्यार्थीहरूलाई आग्रह गरिन् ।
प्रशिक्षक सम्राट् नरसिंह प्रधानले लागूपदार्थ दुर्व्यसनले व्यक्ति, परिवार र समाजमा पार्ने नकारात्मक प्रभावबारे जानकारी गराउँदै किशोर–किशोरीलाई गलत सङ्गतबाट टाढा रही सचेत र जिम्मेवार जीवन बिताउन प्रेरित गरे ।
कार्यक्रममा विद्यालय परिवार, शिक्षक तथा विद्यार्थीहरूको उत्साहजनक सहभागिता थियो ।
