_1725945816.gif)
धरान: उडायो, सपना सबै हुरीले...यो गीत नसुन्ने र नगाउने सायदै कोही नेपाली होलान् । यो गीत वलिउडमा समेत स्थापित गायक, कलाकार मुरलीधर मिजारले गाएका हुन् ।
उनको पुख्यौली जन्मथलो सिरहाको लहान हो भने ससुराली विराटनगर हो । थुप्रै नेपाली र हिन्दी चलचित्रमा अभिनय गरेर तथा आफ्नो स्वरबाट पनि परिचित गायक मुरलीधरलाई धरानेहरुले प्रत्यक्ष सुन्न पाउने भएका छन् । उनलाई मन्नत इन्टरटेनमेन्ट धरानले यही फागुन २७ गते धरानमा प्रस्तुत गर्न लागेको हो । फागुन २७ गते धरानको गार्खा डिर्पाटमेन्ट स्टोरमा मुरलीधर साँझ २०७५ आयोजना हुदैछ ।
आयोजक संस्थाका सञ्चालक तथा समाजसेवी सत्रुघन अन्सारीका अनुसार मुरलीधर साँझमा टिकटदर मात्र ५ सय हुनेछ । यो टिकटमा डिनर(साँझको खाना) पनि स्रोताहरुलाई उपलब्ध गराइनेछ । कार्यक्रममा करिब साढे ३ सय दर्शक, स्रोता रहने उनले बताए । मुरलीधरका अनन्य मित्रसमेत रहेका अन्सारीले अन्र्तराष्ट्रियक्षेत्रमा पनि स्थापित नेपाली कलाकारलाई सम्मान स्वरुप कार्यक्रम आयोजना गरिन लागेको बताए । ‘म आफै पनि कला क्षेत्रसँग जोडिएको मान्छे हुँ, मुरलीधरसँग लामो समयदेखि मित्र हुँ,’अन्सारीले भने,‘राष्ट्रिय कलाकारलाई सम्मान गरौ भनेर यो कार्यक्रम गर्दैछौ ।’
धरानमा आउनुअघि कलाकार मुलरीधरलाई जनकपुरमा पनि फागुन २३ मा अभिनन्दन गरिनेछ । त्यसपछि उनी धरानमा सांगीतिक कार्यक्रम लिएर आउनेछन् । त्यसक्रममा उनलाई धरानमा पनि सम्मान गरिनेछ । मुरलीधरको चर्चित गीत उडायो सपना सबै हुरीले, निष्ठुरीलाई माया गरी आफैलाई रोगी बनाए, चिसो चिसो सिरेटोमा, तिम्रो आँखाको भाका..लगायत थुप्रै चर्चित गीतहरु छन् । उनले नेपाली गीतहरु डेढ सयको संख्यामा गाएका छन् भने हिन्दी, मैथीली र भोजपुरी गीतहरु पनि थुप्रै गाएका छन् ।
मुरलीधर गीत,संगीतमा मात्र होइन, नेपाली र थुप्रै हिन्दी चलचित्रमा पनि अभिनय गरेका छन् । उनको पनि अभिनय रहेको हम आजाद है, मिस्टर इण्डिया चर्चित फिल्म हो । यस्तै, नेपाली चलचित्रमा साइनो, कन्यादान, पीरती, सम्झनालगायत पछिल्लो समय निखिल उप्रेतीको भैरवमा पनि अभिनय गरेका छन् । भोजपुरी र मैथिली फिल्म बनाएका पनि छन् । उनको श्रीमति विष्णुमाया र २ छोरा छन् ।
