धरानको सर्दु खोलामा 'फ्लावर ब्रिज' बन्दै

धरान: खोलामाथि पुल, र पुलमाथि आकाशतर्फ हेर्दा फुलैफुल । आहा..,कत्ति राम्रो ! यो कल्पना हैन, अबको करिब ३ महिनापछि धरान १३ फुस्रेस्थित सर्दु खोलको पुलमा पुग्दा तपाईले साँच्चिकै यो दुष्य देख्न सक्नुहुनेछ ।

आन्तरिक पर्यटक भित्राउने योजना अनुरुप १३ नम्बर वडा कार्यालयले सर्दु खोलाको पक्की पुललाई फ्लावर ब्रिज बनाउन लागेको हो । कुल ६० मिटर लम्बाई ४ मिटर चौडाइ रहेको पुलमा तीन वटा फलामको ट्रष्ट निर्माण गरिदैछ । १२–१२ मिटरको ट्रष्टमा आकाशतिर तारको जाली लगाइदैछ । पुलको दाँया र बाँयातर्फ समेत जाली लगाइदै छ । बगमबेली अर्थात लहरे प्रजाती फुल रोपेर ट्रष्ट माथी झ्याम्मै हुने गरी लगाइने छ । यसरी लहरे प्रजातीको फुल तीनै वटा ट्रष्टलाई ढाक्ने गरी लगाइन्छ । ‘लहरे प्रजातीका फुल रोप्छौं,’धरान १३ नम्बर वडाध्यक्ष नेत्र प्रसाद काफ्लेले भने,‘त्यसले पुलको सौन्दर्य नै अकै देखिन्छ, मानिसहरुलाई लोभ्याउने बनाउछौं ।’

पुलको मध्यभाग छेउको दुबैतर्फ खुल्ला रहने छ । यो पुल शुरुमा कोशी नदिको पुल (भारदह पुल) निर्माणको क्रममा सर्दुखोलाको ढुङगा लान प्रयोग गरिएको घिर्लिङ राखिएकोले वारीपारी गर्नको लागि बनाइएको थियो । जिर्ण अवस्थाको पुलको विच भागमा मानिस जोखिमपूर्ण रुपमा आवतजावत गर्दथे । केही वर्ष अघि मात्र एकिकृत सहरी विकास आयोजना (आयुडीपी)ले खानेपानी योजना शुरु गरेपछि पुलको स्तोरोन्नती गरेको थियो । पुल फराकिलो र दायाबाँया रेलिङ लगाएपछि पुलको मुहार फेरियो । यसपछि वडाले फ्लावर ब्रिजको अवधारण (कन्सेप्ट) अघि सारेको हो ।

त्यति, मात्र हैन, सर्दु खोलाको पुल तरेपछि अलिक मास्तीर कोशी नदीमा बनेको ब्यारेज तथा पुल निर्माणको क्रममा सर्दुखोलाको ढुङगा लान प्रयोग गरिएको ऐतिहासिक घिर्लिङको अवशेष छ । त्यो फुस्रेको महत्वपुर्ण सम्पदा हो । अब यसलाई संरक्षण गर्नको लागि र ऐतिहासिक क्षेत्रको रुपमा चिनाउनको लागि घिर्लिङको अवशेषमा पनि रेलिङ लगाउने काम भइरहेको छ । कोशी ब्यारेज पुलको ५० वर्षको समयावधि यस अघि नै सकिएको छ । त्यस कारण पनि यसको महत्व बढ्दै गएको हो ।

ऐतिहासिक क्षेत्रको संरक्षण र प्रर्वद्धन गर्ने उद्देश्यले अहिले पर्यटकीय क्षेत्रको रुप दिइदैछ । पुलमुनि ढुंगामा यसअघि नै जोडी सर्प कलाकारहरुले कुँदेका छन् । जुन मनै लोभ्याउने खालको छ । सर्दुजलाधार क्षेत्रभित्र पर्ने करिब ३ विगाहा क्षेत्रफलमा फैलिएको यो क्षेत्रमा ओशो ध्यान केन्द्र पनि छ । धरानको खानेपानीको मुख्य स्रोत पनि भएकोले प्राकृति बस्तुहरुलाई असर नपर्ने गरी प्राकृतिक रुपमा नै पार्कको रुपमा विकास गरिने वडाध्यक्ष काफ्लेले बताए । ‘आन्तरिक पर्यटक भित्राउनको लागि फ्लावर ब्रिजको कन्सेप्ट अघि सारिएको हो’ वडाध्यक्ष काफ्लेले भने ‘अब त्यो संगै आसपासका क्षेत्रलाई पार्कको रुपमा विकास गर्ने छौं ।’

निर्माण भइरहेको ट्रष्टमा बगमबेली जस्ता लहरे प्रजातीका फुल रोपिने उनको भनाइ थियो । संघीय सांसद जयकुमार राईको संसद क्षेत्र विकास कोषबाट आएको २० लाख रुपैयाँ बजेटले यो काम थालिएको हो । वीपी स्मृति पार्क निर्माण समितिका संयोजक चक्र खड्काका हाल फ्लावर ब्रिज र घिर्लिङको अवशेषमा सफा गर्ने र रेलिङ लगाउने कार्य भइरहेको छ । ‘फुस्रेबाट मुख्य प्रबेशद्वारको रुपमा फ्लावर ब्रिज बन्दैछ,’संयोजक खड्काले भने,‘घिर्लिङको अवशेषमा सफाइ गरेर रेलिङ लगाउने काम हुदैछ ।’

घुम्न आउने पर्यटकको लागि दुई वटा बस्ने विश्रामलय पनि बनाउने उनले बताए । निर्माण कार्य आगामी असार मसान्तसम्म सक्ने उनको भनाइ थियो । पूर्व सांसद कृष्ण कुमार राई र मीन विश्वकर्माको सांसद विकास कोषबाट आएको १० लाख रुपैयाँले घिर्लिङ भग्नावशेषमा चढ्नका लागि सिढी यसअघि नै निर्माण भइसकेको छ । करिब ३ विगाहा क्षेत्रमा फैलिएको यस क्षेत्रमा आन्तरिक पर्यटक भित्राउनको लागि अन्या योजनाहरु समेत ल्याउने बताए ।