धरान : शारीरिक सुगठन प्रतियोगिता ‘मिस्टर धरान’को २३ र्औ संस्करणका विजेताले यसपाली २ लाख ५० हजार पुरस्कार पाउने भएका छन् ।
मिस्टर धरान प्रतियोगिताको आयोजक एमडी–१६ स्टुडियो फिटनेस धरानद्वारा शुक्रवार आयोजित पत्रकार सम्मेलनमा उक्त जानकारी दिइएको हो । आउँदो असोज २३ र २४ गते आयोजना गरिने प्रतियोगिता बिपी कोइराला स्वास्थ्य विज्ञान प्रतिष्ठानको सदन स्कुल हल र दशहरा हलमा सञ्चालन हुनेछ ।
प्रतियोगिता पाँच तौल समूहमा सञ्चालन हुनेछ । ५५ केजी, ६० केजी, ६५ केजी, ७० केजी तथा ७० केजीमाथि समूहमा खेलाडीहरूले प्रतिस्पर्धा गर्नेछन् ।
प्रतियोगिताका विजेताले २ लाख ५० हजार रुपैयाँ, उपविजेताले १ लाख रुपैयाँ तथा तेस्रो हुनेले ७० हजार रुपैयाँ प्राप्त गर्नेछन् । चौथो हुनेले ३० हजार रुपैयाँ र पाँचौँ हुनेले २५ हजार रुपैयाँ नगद पुरस्कार पाउनेछन् ।
प्रतियोगिताका‘बेस्ट पोज’ र ‘मोस्ट मस्कुलर’ विधाका उत्कृष्ट खेलाडीलाई समेत नगद पुरस्कार प्रदान गरिने आयोजकले जनाएको छ ।
लामो समयदेखि धरानमा सञ्चालन हुँदै आएको ‘मिस्टर धरान’ प्रतियोगिताको निरन्तरताका रूपमा यस वर्षको २३औँ संस्करण आयोजना गर्न लागिएको हो । शारीरिक सुगठन खेललाई वैज्ञानिक प्रशिक्षण प्रणाली र अन्तर्राष्ट्रिय मापदण्ड अनुसार अघि बढाउन प्रतियोगिता आयोजना गरिएको बताइएको छ ।
यसपाली खेलकुद पत्रकारिता मार्फत शारीरिक सुगठन क्षेत्रको प्रवर्द्धनमा योगदान पुर्याउने एक पत्रकारलाई नगद १० हजार रुपैयाँ सहित ‘एमडी–१६ पत्रकारिता पुरस्कार’ प्रदान गरिने पत्रकार सम्मेलनमा घोषणा गरिएको छ ।
प्रतियोगिता एमडी–१६ स्टुडियो फिटनेस धरानको आयोजना, धरान उपमहानगरपालिकाको सहयोग र बडी बिल्डिङ सङ्घ सुनसरीको समन्वयमा सञ्चालन हुन लागेको आयोजकले जनाएको छ ।
