धरान : बिपी कोइराला स्वास्थ्य विज्ञान प्रतिष्ठानको विभिन्न विभागमा कार्यरत करार सेवाका मेडिकल हाउस अफिसरहरूले तलब सुविधा वृद्धिको माग राखी सोमवार देखी गरेको पेन डाउन हडतालको कारण अस्पतालको इमरजेन्सी लगायतका उपचार सेवा प्रभावित हुने सक्ने भएको छ ।
बिपीका निमित्त कार्यालय प्रमुख डा. इन्द्रकुमार लिम्बुले मङ्गलवार एक अपिल प्रकाशित गरी एक वर्षे करार कर्मचारीहरूको जायज मागप्रति गम्भीर ध्यानाकर्षण भएको तथा नियमानुसार सम्बोधन गर्ने कुरामा प्रतिष्ठान सदैव सकारात्मक रहेकोले काममा फर्कन आव्हान गरेका छन् ।
अपिलमा भनिएको छ ‘हाल प्रतिष्ठानमा पूर्ण कालिन पदाधिकारी नरहेको अवस्थामा प्रतिष्ठानको दैनिक प्रशासनिक तथा अस्पताल सेवा प्रभावित हुन नदिनका लागि निमित्त कार्यालय प्रमुखको जिम्मेवारी प्रदान भई कार्य भइरहेकाले पछि पदाधिकारी नियुक्त भएपछि नियम सम्मत ढङ्गबाट प्रक्रिया पुरा गरी जायज माग पुरा गर्न प्रतिष्ठान तयार छ ।’
अहिले हप्ताको सूर्य दिन बिदाका कारण प्रतिष्ठान अस्पतालमा बिरामीको भिड अत्याधिक बढेको अवस्थामा करार कर्मचारीहरू कार्यक्षेत्र छाडेर पेन डाउन हडतालमा उत्रँदा प्रतिष्ठानको इमरजेन्सी लगायत सेवा प्रभावित हुने देखिएकोप्रति प्रतिष्ठानको गम्भीर ध्यानाकर्षण भएको डा.इन्द्रकुमार लिम्बुले अपिलमा उल्लेख गरेका छन् ।
प्रतिष्ठानमा एक वर्षे करार सेवामा कार्यरत मेडिकल हाउस अफिसरहरू उनीहरूले पारिश्रमिक स्वरूप पाइरहेको तलब भत्ता एवं अन्य सुविधा समेतमा वृद्धि गर्न माग गर्दै काम छोडेर पेन डाउन हडतालमा उत्रिएका हुन ।
दुई दिने बिदाको कारण अस्पतालमा बिरामीको चाप बढी रेको बेला उनीहरूको हडतालले प्रतिष्ठानको उपचार सेवा अस्तव्यस्तता हुने अवस्थामा पुग्न सक्छ । त्यसैले तत्काल उनीहरूलाई काममा फर्काउन उनीहरूसँग छलफल भएको कुरा पनि अपिलमा उल्लेख छ ।
डा.इन्द्रकुमार लिम्बुले अपिल मार्फत दैनिक प्रशासन सञ्चालनको मात्र अख्तियारी प्राप्त भएको अवस्था र परिस्थिति मनन गर्दै बिरामीको उपचार सेवा प्रदान गर्ने संवेदनशील कार्य अवरुद्ध नगर्न अनुरोध गर्दै सकै मेडिकल हाउस अफिसरहरूलाई काममा फर्कन आग्रह गरेका छन् ।
