धरान : आर्थिक वर्ष २०८३/०८४ को सङ्घीय बजेटबाट धरान उपमहानगरपालिकाले कुल ८६ करोड १९ लाख रुपैयाँ प्राप्त भएको कार्यवाहक प्रमुख अइन्द्रविक्रम बेघाले बताएका छन् ।
बजेटका लागि प्रधानमन्त्री बालेन्द्र शाहलाई सामाजिक सञ्जाल मार्फत ‘हार्दिक धन्यवाद’ ज्ञापन गरेका कावा प्रमुख बेघाले धरानलाई बजेट दिलाउनमा सांसद हर्क साम्पाङको भने कुनै भूमिका र योगदान नरहेको बताएका छन् ।
उनका अनुसार सङ्घीय बजेटमा विनियोजित रकम मध्ये समानीकरण अनुदान २८ करोड ७९ लाख रुपैयाँ, सशर्त अनुदान ५५ करोड १७ लाख रुपैयाँ, पुँजीगत अनुदान ८३ लाख रुपैयाँ, समपूरक अनुदान ६५ लाख रुपैयाँ तथा विशेष अनुदान ७५ लाख रुपैयाँ रहेको छ ।
कावा प्रमुख बेघाले भने ‘समपूरक अनुदानमा ८० प्रतिशत हिस्सा स्थानीय तहको रहने गरी योजनाहरूमा खर्च गर्नु पर्दछ जसमा २० प्रतिशत मात्र सङ्घीय सरकारको योगदान रहन्छ ।’
समानीकरण अनुदानको रकम उपमहानगरपालिकाले आफ्नो आवश्यकता र प्राथमिकता अनुसार खर्च गर्न पाउने बजेट रकम हो । सशर्त अनुदान मुख्यतः कर्मचारी तलब भत्ता तथा अन्य तोकिएका कार्यक्रमका लागि विनियोजन गरिने रकम भएका उनले बताए ।
कावा प्रमुख बेघाले भने ‘विशेष तथा समपूरक अनुदानको वितरण प्रक्रियामा सङ्घीय सांसदको कुनै प्रभावकारी भूमिका छैन ।’ धरानका लागि विनियोजित बजेटलाई सांसदले पहल गरेर आएको बजेटका रूपमा व्याख्या गर्नु गलत हुने उनको भनाई छ ।
सङ्घीय वित्तीय हस्तान्तरणको नियमित प्रणाली अन्तर्गत धरान उपमहानगरपालिकाले पाएको बजेट रकमलाई कुनै व्यक्तिको पहलबाट आएको भन्न नमिल्ने उनले बताए । सङ्घीय सरकारले उपलब्ध गराएको बजेटको यथार्थ विवरण सार्वजनिक गर्दै धरानको विकास र सेवा प्रवाहमा केन्द्रित भएर बजेट खर्च गरिने उनको भनाई छ ।
धरान उपमहानगरपालिकाले आगामी आर्थिक वर्षका लागि प्राप्त अनुदान मार्फत पूर्वाधार विकास, सेवा प्रवाह तथा प्रशासनिक खर्च व्यवस्थापनमा प्राथमिकता दिएर खर्चिने जनाएको छ ।
